Awe mainta Hues di Corte di Husticia den Promer Instancia a dicta sentencia den e caso sumario cu e companianan di huur step electronico den e sector hotelero: E-Bike y Green Bike a cuminsa contra Gobierno. Esaki ta relaciona cu e decision di Minister di Husticia pa kita tur e stepnan for di caminda ya cu esakinan ta forma un peliger pa trafico y esnan cu ta riba e step.
Por a compronde cu Hues a mustra Gobierno cu mester actua a base di ley y cu e forma con a actua no ta corecto.
SENTENCIA
Hues den su sentencia ta mustra cu dia 21 di April 2026, e Minister di Husticia a anuncia cu, di inmediato, ta prohibi pa uza e stepnan electronico riba caminda publico. Riba 29 di April 2026, un “Ultimo Aviso” di e Minister a wordo publica riba social media y riba 30 di April 2026, Gobierno a manda kita e stepnan electronico.
E companianan E-Bike y Green Bike den Corte a pidi Hues pa prohibi Gobierno confisca e stepnan electronico.
Gobierno no ta di acuerdo cu esey y a presenta un contra demanda caminda ta pidi pa e companianan kita tur e stepnan electronico y e stacionnan di carga for di propiedadnan di Gobierno.
MESTER ACTUA A BASE DI LEY
Hues su decision den e caso sumario aki ta cu, na e momento aki, Gobierno no por kita e stepnan electronico.
Hues a mustra cu si Gobierno kier tuma medida contra e stepnan electronico, esey mester sosode cuidadosamente y segun e forma stipula den ley. Den e caso aki, esey ta nifica cu Gobierno mester manda un carta na e companianan, unda Gobierno ta anuncia cu (y dicon) segun Gobierno e companianan ta actuando contra ley. Gobierno mester specifica di cual ley ta trata, cual medidanan e companianan mester tuma. Ademas Gobierno mester stipula un periodo cu e companianan mester haci esey. Hues a remarca cu Gobierno no a haci nada di esaki den e caso aki.
NO POR KITA STEPNAN Y STACIONNAN DI CARGA
Hues a sigui bisa cu Corte ta dicidi cu e companianan di huur e stepnan electronico, na e momento aki no ta obliga pa kita e stepnan y e stacionnan di carga for di caminda publico.
Hues ta mustra cu aki tambe ta conta cu Gobierno mester prome manda un carta na e companianan cu e peticion pa nan kita nan propiedadnan for di tereno di Gobierno y esaki dentro di un tempo razonabel.
COMPANIANAN MESTER ATENE NA REGLANAN VIGENTE
Hues ta mustra cu e decision aki no ta nifica cu e stepnan electronico por keda pa semper riba caminda publico. Hues ta mustra cu naturalmente e companianan cu ta huur e stepnan electronico, mester atene nan mes na e reglanan vigente.
Esey ta conta tambe pa e conductornan di e stepnan.
Hues ta mustra cu e sentencia ta nifica cu Gobierno no por yega actua, kita stepnan electronico, mientras cu Gobierno mes no ta sigui e reglanan stipula den ley.
