Poco poco pero sigur hopi informacion mas lo bin afo. Pueblo a fada di un gobierno cu e unico cos cu e por hasi ta coba den pueblo su cartera y sigui maltrate. Nos por a lesa cu awor un scol mester bay cobra extra paso e medida di BBO na frontera di 7% a pone cu mester bay paga extra riba e importacion di bukinan di scol. E schoolgeld a subi barbaro y ta na pueblo pa waak con lo bay paga. Muchanan ta bay scol cu hamber y ta obvio cu pa gobierno esey no ta un problema.
Medidanan ta pa minister sigui viaha pero 6 aña di gobierno no duna ningun resultado. Pa prome biaha den historia cu un minister cu ta stima supuestamente Aruba y a core campaña cu lo goberna sin medida ta cu vakantie pa casi 1 luna caba. E portanan a cuminsa cerra pa gobierno paso nan no a logra cerra e prestamo di 20 miyon pa un periodo di 3 luna. Ora un comerciante ninga di paga 11 mil florin na douane pa un container di fruta esaki tambe ta un señal cu e comerciante ta mira cu e lo no bay tin ganashi . Esakinan mester ta un señal cla pa nos gobernantenan cu Aruba su situacion financiero ta hopi malo. Apesar cu gobierno ta gaba cu turismo ta bayendo bon pero placa no ta yega y gobierno kier sigui fia placa. E storia cu e presupuesto 2024 lo tin un surplus ta un storia di compa nanzi.
Ministernan cu ta keha cu prensa ta sembra odio contra gobierno ta un otra storia di compa nanzi. Como minister bo a tuma e puesto pa goberna y pa hiba nos isla padilanti y no ta sinta gana tempo y bin continuamente cu gañamento pa hustifica bo maneho. E gañamento y medidanan cu no ta laga pueblo hala rosea a pone cu pueblo no tin confiansa den e gobierno aki. Pueblo ta wordo suta cu medida y ministernan ta corre den autonan di luho, fiesta y viahenan costoso pero no ta mira ningun resultado di tur e viahenan hasi. Ta bon pa boso reflexiona y cambia di actitud y trese un cambio den maneho.
Nos centro di ciudad ta morto paso e parkeermeters no ta duna ningun resultado, RioolWater ZuiveringsInstalatie na Bubaliplas no a move ni un pia pa dilanti. Situacion di Postkantoor no a cambia y Serlimar su situacion no tin mehoracion. Aruba ta mas sushi cu nunca. Arubus otro mas cu minister ta sinta gaña trahadornan. E minister mester mira cu ta su gañamento ta locual cu ta hink’e den problema. No busca e splinter den wowo di otro sino saca e balki for di bo wowo.
E escandalo den husticia ta caba di corona malgobernacion. E ta e cherry riba punta di e iceberg. Si nos husticia ta bayendo malo henter nos pais ta bay malo. Esaki ta e resultado di locual cu e gobierno a sembra y awor e ta recohe e cosecha. Ora bo bay contra leynan di Dios esaki ta e resultado. Pueblo tene duro paso ainda falta un poco mas. E gobierno aki lo cay cual mas lihe cu nos ta kere. Dios tin su tempo y e tempo di Dios ta perfecto. Laga nos sigui confia den Dios y tene duro na Dios te ora cu e tormenta perfecto aki caba di pasa. Despues di esaki pueblo lo bay haya un alivio. Asina ta no perde speransa. Partido Curpa e unico alternativa.
Comunicado Eric Ras Lider di partido Curpa
1 comment
[…] Source link […]