Parlamentario Endy Croes a amplia riba e asunto di spearfishing pa nos piscadornan. Berdad ta trata di un ley desde 2001 cu ta prohibi cierto practikanan. Alaves e parti onderwaterjachtmiddel ta complica esaki poko mas y mester un areglo pa esaki. Desde cu Covid 19 a bati na porta hopi cos a cambia y nos tur ta papia di un normal nobo. Hopi ta esnan cu perde trabou y hopi ta esnan cu ta bay lama pa buska alimentacion pa nan famia den e Pandemia aki.
/// Parlamento a jama 2 Openbare Bijeenkomst:
Piscadornan a entrega un manisfesto na Parlamento y basa riba esaki Presidente di Parlamento Juan Ady Thijsen a jama e promer Openbare Bijeenkomst dia 25 di September pa asina por trata e problematica aki y jega na un solucion. Como cu Minister di Husticia Andin Bikker a splika cu den un siman e por tin un Landsbesluit kla pa por presenta bek na Parlamento a bay di acuerdo y a jama un di dos Openbare Bijeenkomst diahuebs 1 di October pa mira con leew Gobierno ta cu esaki. Durante e reunion aki sinembargo no a sinti cu e ministernan tabata riba un liña es decir Chris Romero y Andin Bikker tabata voorstaander pa un gedoogbeleid anticipando riba cambionan den ley pa reglamenta esaki mientras Minister Marisol Lopez Tromp no abata sinti pa un gedoogbeleid sino pa cana e caminda di ley cual lo bay tuma basta tempo. Fraccion di MEP na e momento ey durante Openbare Bijeenkomst a pidi presidente pa jama un Openbare Vergadering mesora unda por bin cu un mocion como instruccion pa gobierno pa por regla esaki. Asina Presidente di Parlamento a cumpli mesun dia y pa 630pm atardi a jama e reunion publico.
/// A entrega un mocion unda a duna gobierno 10 dia:
Fraccionnan tur a bay di acuerdo pa hunto entrega un mocion cual a carga sosten di Parlamento den su totalidad cual a urgi gobierno pa soluciona e problematica aki permitiendo nos hendenan pa nan por tira piska na un manera reglamenta pa asina nos sobrevivi e crisis aki cu ta asotando Aruba y henter mundo bastante fuerte. Un parti di e mocion literalmente a expresa lo siguiente:” Ta urgi Gobierno di Aruba pa dentro di 10 dia di trabou implementa un gedoogbeleid pa cu spearfishing, anticipando riba e Landsbesluit, houdende algemene maatregelen.” Tambe a pidi gobierno pa regla voorschriften nan nobo alrespecto onderwaterjachtmiddelen conosi como harpoen etc. Parlamento lo keda atento y pronto lo jama e Ministernan concerni pa asina determina si finalmente por anucia e maneho nobo anticipando cambionan den Ley. Hende pa nos ta central y den crisis nos mester percura pa nos hendenan tin acceso na cuminsa entreotro pisca. Mas cu klaro cu regulacionnan respetando tur tratado y ley existente.