Graduacion di Rayo di Solo kleuterschool titula ‘’Safari” a tuma lugar den Theresita Center, San Nicolas e siman cu a pasa. Un total di 46 alumno a ricibi nan certificado oficial for di e juffrouw di nan klas. Klas 1 tawata juffrouw Sherida, klas 2 juffrouw Zuleima, klas 3 juffrouw Dayene y klas 4 juffrouw Jessica. Presente tawata juffrouw Kristel, meneer Robert y tanchi Golin.
E MC tawata meneer Addonsito Croes y e dj meneer Robert Dijkhoff. E fotografo tawata Kelly Mertosentono. Tawata e cabesante juffrouw Ilse Mertosentono cu a yama un y tur bonbini y tambe a haci e oracion di bendicion.
Despues cu himno di Aruba Dushi Tera a ser presenta, tur mucha a canta e himno di Rayo di Solo. Bou guia di juffrouw Ruth a presenta un grupo di 8 mucha cu e wals titula “Encantadora” di Rufo Wever. Juffrouw Griselda a presenta cu un grupo grandi e cancion “Wapa E”. E potpurri di canticanan di mucha a ser presenta pa juffrouw Ilse y su alumnonan. Tambe e cancion “Hand in Hand” di Koreana cu e letranan na Papiamento di Maybeline Arends-Croes, “ Man den Man” tawata presenta.
A cera e anochi unico aki cu carnaval caminda tur mucha a busca nan mayor pa balia cu nan. Gran parti di tur graduado ta bay Colegio Santa Filomena, Scol Basico Xander Bogaerts, Colegio Santa Theresita y Sagrado Curason. Rayo di Solo ta existi 66 aña y ultimo 8 aña ta ser dirigi pa cabesante Ilse Mertosentono. Exito na tur mucha na nan scol nobo.
