E reto ta grandi pero e satisfaccion di graduacion ta ma
Inicitiava di Gabinete Mike Eman I ainda ta duna su frutonan
Cu satisfaccion y un sentido profundo di orguyo, ta mira con e hobennan di Formacion Social a acepta e oportunidad cu nan a haya den bida y cu awe nan ta cosecha e fruto di nan esfuerso y sacrificio, ta locual Premier Eman a expresa durante ceremonia di graduacion di e hobennan cu a participa den e programa di Formacion Social (SVT)
A haya oportunidad di combersa cu algun di e graduadonan, cu a comparti nan sentimento despues di a logra finalisa e curso exitosamente. G’Dior Tromp, di bario di San Fuego, a indica cu na inicio e tabata dificil p’e. E no tabata comunica cu ningun hende, pero mientras dianan tabata trascuri y a cuminsa convivi cu demas participante, gradualmente a cuminsa papia.
El a haya hopi sosten y a siña conoce cada persona mas. Ta di pensamento cu e miho opcion ta paden formando parti di SVT. E ta significa un cambio drastico pa bo bida. Tromp ta tuma e reto pa continua, e lo uni cu e team di Parke Nacional Arikok pa un periodo di stage, mientras e lo analisa su siguiente paso, cu muy probablemente lo ta na Kazerne mes.
Bradley Werleman, ta bin di bario di St. Cruz cu tambe a forma parti na e programa Formacion Social. Su experiencia tabata uno positivo, a indica cu mescos cu pa tur otro curcista na comienso ta un etapa dificil. Tabatin un bista di kico por a spera, pero e realidad a surpasa su expectativa. Hopi experiencia nobo!
Werleman ta contento di a accepta e reto aki, un trayectoria sumamente dushi. A comparti y convivi cu demas participante, a biaha pa Corsou, a gana medaya y a participa den grupo diferente trayectoria cu nunca a kere di bay logra.
Gradecido pa e oportunidad y emociona pa e siguiente fase, cu ta ARUMIL. E experiencia a ki a habri hopi porta, ademas di habri su wowo pa chensnan cu ta presenta y cu bo no por laga bay perdi.
E programa aki ta brinda oportunidad na hopi hoben eyfo. Momento di realisacion ta pone bo mira bida diferente, ausencia na scol, ‘hangout’ henter dia cu broternan y no busca un trabou tabata e rutina diario, cu awo a cambia. Busca oportunidad pa bay dilanti, sino bo ta bay keda atras, ta locual cu Bradley a expresa.
Un logra personal, pero tambe dedica na su mayornan, su kadernan, na Mike Eman cu ta e persona cu a bin cu e proyecto aki, cu awe ta e felicidad cu e ta sinti pa a finalisa e curso.
“Despues di tur tempo malo, solo lo sali briya”, inclui den e diseño cu Werleman a haci pa simbolisa e esfuerso, reto y meta cu e grupo aki a pasa aden. Hunto nan a logra. Ni con perdi bo por ta den e mundo aki, semper tin un luz cu lo guia bo y awe nan por bisa cu nan bida a cambia y nan ta mira porfin e luz di oportunidad.
A combersa tambe cu hoben Kendrick Yarzagaray di Tanki Leendert. A sigui conseho y awe e ta orguyoso di a finalisa e programa di SVT. Dificultad cu estudio a pone cu a busca alternativa y ta contento di a haya esaki den Kazerne. Luchando pa un miho bida!
Duro na comienso, a adapta y siña na caminda, segun palabra di Kendrick: “Den bida tur cos ta pa siña”. Orguyoso di e logro, di por haci su famia contento bek. Agradecido di e oportunidad y di por a forma parti di un grupo cu lo t’ey pa otro, y yuda otro di awo en adelante.
Oportunidad pa sigui ta un opcion, stage of forma parti di ARUMIL tambe lo por ta den plan.
Formacion Social (SVT) na Aruba ta un oportunidad pa hobenan entre 17–25 aña pa forma disciplina y prepara nan pa e mercado laboral. E programa ta inclui entrenamento cu ARUMIL y stage den companianan local. A proyecto di SVT ta yuda hopi di e hobennan cu termina e trayecto aki, pa haya un trabao.
E trayecto di SVT ta parti den 2 fase:
Fase 1 (militar): Ta tuma luga na Marinierskazerne na Savaneta bou supervision di ARUMIL. Esaki ta dura mas o menos 16 siman y ta inclui entrenamento fisico, disciplina y respet.
Fase 2 (empleo/estudio): Hobenan ta haci curso y stage na companianan local. A traves di Enseñansa pa Empleo, SVT ta habri porta pa trabou of estudio.
Mas cu 80% di participantenan cu caba e programa aki ta logra haya trabou of sigui un formacion. Originalmente e programa tabata solamente pa hobennan masculino, pero awendia hobennan femeninotambe por participa di forma separa.
