Den loke hopi ta considera un tactica di intimidacion, Aruba a enfrenta un deadline crucial den e procesonan di refinanciamento di su debe. E situacion ta lanta preguntanan serio tocante si Hulanda ta actuando como un socio den desaroyo of como un abusador di poder, probechando di e vulnerabilidad financiero di nos pais na momento di COVID.
Mike Eman, Geoffrey Wever, y Gerlien Croes, ta na altura di e situacionnan aki, pero ,den luga di para firme pa e autonomia y derechonan di Aruba, nan ta permiti Hulanda distorsiona leynan y pone presion indebido riba e pais unda cu Parlamento ta perde su poder. E pregunta grandi na tur tres minister di Aruba , Na ki momento realmente como mandatarionan di Aruba a para pa defende Aruba ?
E menasa di un “Default” artificial cu a hunga como presion pa Aruba firma
E realidad ta cu Aruba ta cumpliendo cu su obligacionnan di pago. Sinembargo, a sali na cla cu Hulanda a uza su PODER cu e menasa di un asina yama ‘default’ (incumplimento di pago) como un instrumento di presion. Documentonan recien den posesion di EA News ta confirma cu Hulanda a busca di maneha e percepcion di banconan internacional, insinuando cu Aruba no lo tabata cumpli, cu e fin unico di forsa Aruba den un posicion di debilidad pa asina cede mas poder soberano.
E cronologia di un presion forsa
Documentonan firma pa e ex-mandatario Hulandes Alexandra van Huffelen ta revela e forsa di e “ultimatum” cu a wordo poni riba mesa. Pa Aruba por a logra e refinanciamento necesario, e pais tabata obliga pa firma un acuerdo bou condicionnan severo prome cu dia 10 di oktober.
E exigencianan tabata estricto:
• Deadline 1: Aruba mester a reacciona riba e proposicionnan di e acuerdo di
fiansa prome cu dialuna, 09:00 (ora di Hulanda).
• Adaptacion: Un acuerdo adapta tabata rekeri, cu mester a wordo manda bek prome cu diamars, 09:00 (ora di Hulanda).
• Firma: E firma aki tabata e condicion sine qua non (indispensabel) pa e mandatario Hulandes por a procede cu e firma oficial inmediatamente despues di e votacion den e Eerste Kamer.Sino Aruba tin e menasa di Hulanda riba su lomba
E “Wega di Poder”
Den e documento preto riba blanco, Hulanda a pone un carta riba mesa cu, den esencia, tabata bisa: of Aruba ta acepta e condicionnan, of Hulanda lo a declara e pais den ‘default’ internacionalmente. Esaki, maske cu Aruba a mantene contacto intensivo y constructivo durante lunanan tras di lomba cu e meta pa yega na un solucion satisfactorio. Pero Hulanda a keda pusha pa haya mas poder y poco poco ta logrando tambe, si Parlamento di Aruba sigui permiti e desaroyonan cu ta tumando luga.
E preguntanan cu awor ta keda den aire ta: Te ki punto Aruba por tolera e uzo di e aparato estatal Hulandes pa kibra su pia ora di negosha? Y te ki punto nos mes politiconan ta complice den e erosie di nos propio derecho?
EA News lo sigui monitorea e documentonan aki y e impacto legal cu e condicionnan aki tin riba e autonomia financiero di Pais Aruba. Ainda falta un documento pa Sali na cla kende realmente a firma pa e Rijkswet HOFA cu tanto Aruba y Hulanda ta sconde y of no kier sake na cla pa e berdadero cara di e gobierno di AVP –FUTURO of e berdadero cara di e intencionnan di Hulanda pa cu Aruba ?
