Den luna di mart 2025 Direktorado di Supervishon i Mantenshon di Lei, huntu ku ‘Omgevingsdienst Nederland (ODNL)’ a inspektá 47 garashi pa drecha outo na Boneiru. E inspekshonnan tabata forma parti di e proyekto “Empresa di garashi 2025” i nan tabatin komo meta pa kontrolá si e garashinan ta kumpli ku e reglanan di medio ambiente. Kaminda ta nesesario ta aktua pa mantené lei.
A konstatá mas ku 200 violashon
Durante e inspekshonnan a konstatá en total 202 violashon. Mayoria di e violashonnan tabatin di haber ku falta di sufisiente protekshon di suela i almasenahe di supstansianan peligroso den un forma insigur. E hayasgonan mas importante:
Protekshon di suela:
32 empresa sin baki pa lèk
11 empresa tabata traha sin ningun protekshon di suela
17 empresa no tabatin un bon drenahe pa zeta i awa
21 empresa no tabata disponé di material pa apsorbé supstansia peligroso
19 empresa no tabatin un instalashon pa separá zeta
Siguridat kontra kandela:
12 empresa no tabatin nan bòternan di gas bon sigurá
4 empresa no tabatin un almasenahe apart pa bòter di gas
12 empresa no tabatin aparato pa paga kandela òf no a kùr esakinan
Otro violashonnan:
17 empresa no tabata separá nan sushi
5 empresa no tabata fangu e gas fluorado di èrko
8 empresa no tabata sera nan kabina di spùit outo bon
No a hasi notifikashon na entidat públiko Boneiru:
44 empresa segun e reglanan tin obligashon di notifikashon, pero nan no a registrá na entidat públiko Boneiru
Tur tabata den violashon
Ningun garashi pa drecha outo a sali sin violashon for di e kontròl. E situashon ta preokupante. Prinsipalmente e protekshon malu di suela i e siguridat defisiente di kandela por kondusí na daño na medio ambiente i siguridat.
E garashinan a haña 8 siman pa rekuperashon
E garashinan a haña atvertensia por eskrito pa tur e violashonnan. Nan tin 8 siman pa solushoná e problemanan. Despues ta bini un kontròl di nobo.
But si no tuma akshon
Si despues di e di dos kontròl resultá ku no a solushoná e violashonnan, e ora ei ta sigui un asina yamá (intenshon di) ‘last onder dwangsom’. Esaki ta nifiká ku ta imponé un but si ainda e garashinan no tuma medida. Pago di e but no ta nifiká ku e obligashon ta kaduká: mester tuma e medidanan tòg.
Reunion di informashon
Dentro di poko Direktorado di Supervishon i Mantenshon di Lei ta organisá un reunion pa tur garashi di drecha outo. Durante e reunion akí ta papia tokante e medidanan ku ta bai tuma i e akshonnan di mantenshon di lei, i ta duna splikashon tokante esakinan.
Akshon ta nesesario awó
Direktorado di Supervishon i Mantenshon di Lei ta hasi un yamada urgente pa drenta den akshon. Protekshon di medio ambiente i siguridat di hende i bisindario ta na peliger.
