E Fundashon Herensia di Garifuna, den kolaborashon ku Universidad di West Indies Campus Global na St. Vincent I Grenadines (SVG), a organisa un evento historiko ku ta selebrá e resiliensia i herensia kultural di e pueblo Garifuna. Un di e invitadonan spesial na e evento tabata e delegashon di Bonaire, James Finies lider di Pueblo Progresivo Uni, i Davika Bissessar Shaw presidente di Bonaire Human Rights, representando e lucha kontinuo pa hustisia i autodeterminashon den e region di Karibe.
Un momento signifikativo di e evento tabata e peregrinashon di regreso na e tera ansestral , e isla Balliceaux, kaminda desendientenan di Garifuna, inkluyendo esnan ku nan antepasado a ser exiliá pa Honduras, a regresá na nan tera ansestral pa e prome biaha desde 229 aña. E isla Balliceaux, ku no tin hende ta biba tin un gran signifikashon pa e pueblo Garifuna, ku ta desendiente di Afrikano i pueblo Nativo. Na 1796, militarnan Britaniko a exiliá mas o menos 5,000 Garifuna na e isla, un akto di genosidio kontra pueblo Indígena, kaminda mas di mitar a muri di hamber prome ku nan a ser rekoloká na Roatán, Honduras. Esnan ku a sobrevivi a mantene nan idioma, kultura i tradishon, i awor tin komunidadnan grandi di Garifuna na Belize, Guatemala, Honduras i Nicaragua. E biahe emoshonal tin un nifikashon mas profundo despues ku e Gobiernu di SVG a atkeri Balliceaux bek 4 di Maart 2025.
E evento a kuminsá ku un orashon di e Delegashon Royal Yurumein, sigui ku mucha nan di skol ku a kantá himno nashonal di St. Vincent i Grenadines den idioma Garifuna. E Minister di Edukashon, Hon. Curtis King, a dirigi su mes na esnan presente, preparando e esena pa tres dia di diskushonan tokante historia, identidad i hustisia. Durante e seremonia di klousura, Prome Minister Ralph Gonsalves a duna un spich poderoso tokante inhustisia kolonial i reparashon, resaltando no solamente e lucha di e pueblo Garifuna, sino tambe di Boneiru. Un momento di rekonosimentu i solidaridat tabata ora Prome Minister Gonsalves a invitá James Finies i Davika Bissessar Shaw pa lanta para, I a rekonosé nan esfuerzo kontinuo pa lucha pa protekshon di Boneiru bao di Nashonan Uní i Ley Internashonal. E la kompará e kaso di Bonaire ku e situashon Garifuna-Balliceaux den tempu moderno. Despues di e konferensia, e delegashon di Bonaire a sèr invitá na un resepshon na residensia di Prome Minister, kaminda nan a envolvi den dialogo ku diplomatikonan internashonal, inkluyendo e representante Britaniko.
Riba 14 di Mart, Dia di Heroe, un seremonia pa pone krans i salúdo militar a honrá e uniko heroe nashonal di St. Vincent i Grenadines, Joseph Chatoyer, ku su resistensia kontra e forsanan kolonial I ku ta kontinua na inspirá generashonan. E evento a kulminá ku un peregrinashon emoshonal na isla Balliceaux, kaminda desendientenan di Garifuna a kana riba e tera kaminda nan antepasadonan a ser eksiliá. Un desendiente di Garifuna, a bisa: “Palabra no por ekspresa kon nos a sintí ora nos a pone pia riba Balliceaux. Esaki no ta simplemente un biahe—ta un regreso na nos tera ansestral, un momento de reflekshon ku historia, i un rekordatorio di e forsa di nos pueblo.”
E evento historiko no solamente a honrá e pasado, sino tambe a reforsa e lucha kontinuo pa derecho di e pueblo Karibeño, preservashon kultural, hustisia i reparashon pa pueblonan kolonisá den Karibe.
