Un di e pilarnan mas fundamental pa garantisa e bienestar di nos trahadonan na momento cu nan yega e edad di retiro ta un sistema di pension solido. Den e contexto aki, e Landsverordening Algemeen Pensioen (LAP) e ley di pension general diseña specificamente pa e empleadonan den sector priva ta hunga un rol crucial pa sigura e poder di compra y un bida digno pa esnan cu a dedica añanan di trabou na nos economia.
E ley aki, cu a keda introduci na aña 2011 bou di Gabinete Eman I, a wordo crea cu e meta pa obliga y facilita cu e patrono (doño di trabou) ta retene e prima di e salario di e empleado pa wordo deposita den un fondo di pension. Sinembargo, pa un ley por cumpli cu su obhetivo social, e no tin cu existi simplemente riba papel, e mester wordo ehecuta, controla y supervisa debidamente.
E Reto di Cumplimento y e Falta di Supervisor (Toezichthouder)
Aunke e marco legal ta existi, e implementacion y e cumplimento (handhaving) di e ley aki a enfrenta obstaculo serio durante e ultimo añanan. Den aña 2017, e Raad Sociaal-Economische Raad (SER) a realisa un evaluacion profundo di e ley LAP. Den e informe ey, presentá na Gabinete Wever-Croes y, e conseho a señala claramente cu tabata falta un elemento clave: e nombramento di un supervisor oficial (toezichthouder).
Lamentablemente, for di aña 2017 te cu 2024, no a nombra e supervisor aki cu ta necesario pa e ley por funciona de facto. E ausencia di un supervisor pa mas di shete aña a crea un bashi unda cu no tabatin e control adecuado pa sigura cu tur patrono ta cumpli cu e obligacion di e ley di pension, laga e trahadonan den un posicion vulnerabel.
E Rol di Parlamento y e Deber di Gobierno
Parlamento di Aruba tin e responsabilidad constitucional di crea ley, pero tambe di ehecuta su rol di control (controlerende taak) riba e maneho di Gobierno. Ora un ley importante manera LAP no ta keda ehecuta debidamente, ta deber di e parlamentarionan pa exigi accion y transparencia.
E falta di atencion y e falta di un dialogo di e gobierno anterior cu e sector empresarial (doñonan di trabou) a stagna e progresonan cu mester a tuma luga. Sin dialogo structura entre Gobierno y e patrononan, e pasonan concreto pa garantisa e ehecucion di e ley aki no a materialisa.
Mirando pa Futuro: Pasonan Concreto pa Proteha e Trahado
Pa por garantisa un futuro financiero sigur pa e trahadonan di sector priva, ta di vital importancia pa tuma e pasonan necesario pa:
1. Nombra e Supervisor (Toezichthouder): Activa e mecanismo di control legalmente stipula pa garantisa cu e primanan ta wordo cobra y deposita debidamente.
2. Fortalece e Control y Cumplimento (Handhaving): Asegura cu e leynan existente ta wordo respeta y ehecuta pa tur e partidonan envolvi.
3. Reestablece e Dialogo Social: Drenta den consulta directo cu e doñonan di trabou pa yega na acuerdonan practico y concreto cu ta beneficia e forsa laboral di Aruba.
E pension di e trahadonan den sector priva no ta un luho, sino un derecho adkiri despues di añanan di esfuerso y dedicacion. Ta momento pa nos leynan no solamente existi, sino funciona na bienestar di e ciudadano.