Despues di a dedica añanan di su carera profesional como polis y na mes momento a redacta y skirbi buki pa cuerpo policial, instancianan gubernamental y den sector priva, autor Edgar Ras a tuma e iniciativa pa drenta e mundo di ficcion/ historia real pa mucha y hoben. Su prome obra ta haya su origen den un experiencia den su soño.
Un soño cu a bira e chispa creativo
E idea pa e buki no a nace di un plan predetermina, sino di un soño cu e autor a experencia durante cu e tabata drumi. Den e soño, e figura di Willem Rasmijn un personahe vincula na e historia di descubrimento di oro na Aruba, a presenta na di su mayornan pidi permiso pa drenta e cunucu. E experiencia aki a funciona como e impulso cu e autor tabata tin mester pa bolbe tuma e pen y cuminsa skirbi di bek.
Loke a cuminsa como un proyecto chikito pa mucha a haya un giro nobo ora e autor a comparti e draft di e buki cu su rumannan. Bou di e sugerencia di su ruman grandi Wilfred, e proyecto a expande pa bira un buki mas amplio na Papiamento, dirigi pa duna bida na un historia real cu pa hopi tempo a keda lubida na Aruba.
E proceso di redaccion a wordo apoya pa e famia Ras, kende a forma un “club di lesamento” pa aporta idea y refina e contenido. Mas cu un simpel buki pa scol, e proyecto a desaroya den un publicacion cu e meta pa resalta e aventura di e much’homber cu a haya e prome piesa di oro den un rooi mientras e tabata cuida carne.
Pa garantisa e autenticidad y e contexto historico y natural di Aruba, e autor a a busca varios informacion , pero tambe consulta cu Sra. Olinda Rasmijn, un conocedo di historia, mata y mondi di Aruba. Sra. Rasmijn a duna su aportacion pa compila y enrikece e historia nan cu ta forma parti di e obra final.
E autor a enfatisa cu su estilo no ta di un historiado, sino di un scribido di ficcion historico. Su obranan ta combina fecha nan historico chikito y real cu elementonan ficticio pa hacie atractivo pa e publico lector.
E buki ta enfoca riba e epoca prome cu Segunda Guera Mundial. E autor tin plania pa caba pa continua cu un serie di publicacionnan similar, entre nan bukinan dedica na e Indigenan Caquetio y historianan di familiarnan di Aruba.
E buki nobo aki ya hunto cu su proyectonan ta obtenibel pa publico general na e libreria di Van Dorp. E ta un invitacion pa e pueblo Arubano, specialmente e hobennan, por siña y disfruta di nos historia y leyendanan pa medio di literatura na Papiamento.
