Despues di e difusion di un video riba rednan social y medionan di comunicacion local tocante un incidente na San Nicolas, Directora di Fundacion Berthel, Sra. Irena Gomes, a saca su vos pa aclaria e suceso, expresa su profundo lamento pa e falta di investigacion periodistico y denuncia e intento pa desacredita e labor di e fundacion.
Sra. Irena Gomes, kende a regresa Aruba despues di a echecuta e mesun labor di cuido social na Hulanda, tin mas di 9 aña dedica su bida na cuida y guia personanan vulnerabel den necesidad. E ta colabora cu diferente instancia social, di guia y di apoyo pa asylzoekers y personanan den caya.
Lamentablemente, un persona cu tabata presente a graba e intervencion aki sin comprende e contexto. E material a wordo publica riba Facebook y posteriormente difundi pa medionan local sin prome busca e version di e fundacion of investiga e berdad.
“Mi ta pon’e enfasis riba 24ora pasobra nan no a bin punta mi nada. Dicon nan no a acerca mi y bisami: ‘Señora, nos a haya un keho, nos kier papia cu bo’? Ta facil pa coy cualkier cos y pon’e riba noticia, un cos cu no ta berdad,” Sra. Gomes a expresa cu dolor.
E difusion sensacionalista aki a causa un impacto fuerte no solamente den comunidad, sino tambe den e bida personal di Sra. Gomes. Su mesun yiunan na Hulanda a tuma nota di e publicacionnan y a yama preocupa y den yoramento.
“Mi yiunan di Hulanda ta yama mi yora y puntra mi kico a pasa. Nan ta bisa: ‘Mama a bay Aruba pa haci bon pa hende, anto mira con nan ta trat’abo.’ Mi ta haya esaki hopi lamentabel,” Sra. Gomes a relata.
Malgasto di e situacion aki, Sra. Gomes ta reitera cu e mision di Fundacion Berthel ta basa riba amor, proteccion y duna oportunidad na esnan cu mas mester di dje. Tur atardi e fundacion ta ofrece un espacio sigur pa e clientenan, compartiendo palabranan di fe, organisando actividadnan manera hunga domino, y preparando cumindanan special pa esnan cu ta biba den caya, specialmente durante e temporadanan di fiesta.
“Tur hende tin e derecho pa haya un segundo oportunidad. Ora hopi di nos ta na cas ta come cu nos yiunan, nos ta lubida cu tin hendenan den caya cu no tin nada. Esey ta e trabou cu nos ta haci tur aña cu hopi amor,” e a enfatisa.
Finalmente, e Directora di Fundacion Berthel a haci un apelacion fuerte pa stop e stigma y e abuso contra e personanan cu ta biba den caya, kendenan hopi biaha ta wordo yama “choller” manera un forma di desprecio.
Sra. Gomes a denuncia cu e mesun bisiñanan y personanan den e area hopi biaha ta duna e muchanan aki alcohol, droga of placa, provocando nan pa nan bin haci desastre den e fundacion:
“Nan ta uza e muchanan aki cu tin problema pa haci desastre aki den pa asina e luga cera. Esey ta lo cual mi ta kere nan kier logra. Pero mi ta haya hopi lamentabel cu den luga di yuda nan, nan ta bin provocanan y duna nan cosnan pa despues husga nan,” Sra. Gomes a duna di conoce .