Un lugar cu casi un siglo pasa tabata esencial pa garantisa suministro di awa na Aruba, awor ta preparando pa haya un funcion nobo: conserva e historia, memoria y conocemento di nos pais pa generacionnan cu ta bin.
Diaranson atardi, Prome Minister Mike Eman a presencia na Kibaima e ceremonia oficial relaciona cu e siguiente fase pa restauracion y reutilisacion di e tankinan historico di awa, cu e vision pa acomoda Archivo Nacional Aruba y crea un centro moderno di conocemento y patrimonio.
Durante e ceremonia a firma tanto un Erfpachtovereenkomst como un Samenwerkingsovereenkomst entre Pais Aruba y Stichting Monumentenfonds Aruba, formalisando asina un paso importante den desaroyo di e proyecto.
Pa Premier Eman, kende tambe ta carga responsabilidad pa Cultura, e significado di e momento ta bay mucho mas leu cu restauracion di un monumento.
El a invita esnan presente pa imagina un Aruba di antes, ora habri un cranchi y haya awa limpi no tabata algo automatico. Den un isla seco manera Aruba, generacionnan anterior a conoce periodonan di scarsedad severo, cosecha cu a fracasa y dificultad pa haya suficiente awa.
E tankinan di Kibaima ta testimonio di e periodo ey, pero tambe di e manera cu Aruba a busca solucion.
Segun Premier Eman, precisamente e historia ey ta algo cu mester conserva.
“E ta conecta nos cu e historia di ken nos ta, di unda nos a bin y unda ciudadanonan cu a biba den e pais aki a desaroya e habilidad pa supera e tipo di retonan aki,” Eman a expresa.
For di conserva awa pa conserva conocemento
Pa Premier, tin un simbolismo special den e funcion nobo cu e tankinan lo haya. Unda cu antes e reservoirnan tabata forma parti di un infraestructura cu tabata conserva awa pa comunidad, awo e mesun structuranan historico lo contribui na conservacion di conocemento y patrimonio.
Eman a enfatisa cu Aruba ta un comunidad cu naturalmente ta mira hopi dilanti y ta concentra riba futuro. Pero precisamente den e proceso ey, tin e riesgo pa lubida di unda nos a bin.
P’esey el a destaca e trabou cu institutonan manera Archivo Nacional Aruba, Biblioteca Nacional Aruba y Stichting Monumentenfonds Aruba ta haci pa conserva e memoria colectivo di pais.
Un documento, un edificio, un obheto of otro material historico por conta algo di e Aruba di ayera y yuda siguiente generacion comprende miho e sociedad cu nan a hereda.
Premier a expresa aprecio special pa e trabou di Archivo Nacional y Biblioteca Nacional pa haci material historico mas accesibel, via Coleccion Aruba.
Un hogar pa Archivo Nacional
Director di Archivo Nacional Aruba, drs. Raymond Hernandez, a describi e momento como uno particularmente emotivo. Despues di alrededor di 30 aña buscando un localidad adecuado pa conserva patrimonio nacional, e proyecto na Kibaima ta acerca Archivo Nacional na posibilidad di finalmente dispone di un facilidad cu ta cuadra cu su responsabilidad.
Hernandez a enfatisa cu un archivo moderno no ta solamente un luga pa warda papel. E ta conserva documento, potret, video, audio, mapa, buki y otro material cu ta conta historia di Aruba.
Su vision ta pa Kibaima eventualmente bira un centro di conocemento y patrimonio, habri pa comunidad, scolnan, studiante, docente y investigador.
Den palabranan di Hernandez, e sitio cu un tempo tabata carga awa pa sostene poblacion, awor por bira un fuente di conocemento pa grandi y chikito.
Un segundo bida pa patrimonio
Minister Rene Herdé a enfoca riba e oportunidad pa duna e monumento un segundo bida. Segun Herdé, conserva patrimonio no ta simplemente drecha beton of warda material antiguo; ta conserva e rikesa di conocemento, cultura, recuerdo y experiencia cu otro generacionnan a laga atras.
E proyecto, ta permiti Aruba sigui construi riba trabou y vision di esnan cu a bin prome.
For di Stichting Monumentenfonds Aruba, Directora Petra Davis a splica cu restauracion y adaptacion di e tankinan lo tuma luga den diferente fase, cu atencion tanto pa nan balor monumental como pa e rekisitonan specifico di un facilidad moderno pa archivo.
Conocemento como un oportunidad pa futuro
Premier Eman a mira tambe posibilidad pa e desaroyo na Kibaima conecta cu otro iniciativa di conocemento den e area, incluyendo Smart Community.
Su aspiracion ta cu Aruba por sigui desaroya centronan di conocemento cu no solamente sirbi nos propio comunidad, sino cu eventualmente por permiti nos isla comparti y exporta conocemento.
Na final, Premier Eman a expresa gradicimento na tur e institucionnan y personanan cu a contribui na e proyecto y particularmente na Gobierno Hulandes pa e sosten financiero brinda.
Cu e acuerdonan firma, e tankinan di Kibaima ta drenta un siguiente capitulo.
Un monumento cu ta conta con Aruba a lucha pa garantisa algo tan esencial manera awa, awo ta prepara pa conserva algo igualmente esencial: e memoria di ken nos ta, unda nos a bin for di dje y e conocemento cu nos kier pasa pa siguiente generacionnan.
