Despues di un incidente cu a wordo difundi riba rednan social y den medionan di comunicacion local, Directora di Fundacion Berthel na San Nicolas, Sra. Irena Gomes, a tuma e iniciativa pa aclaria e situacion y splica e contexto di lo cu a sosode siman pasa durante un actividad cerca di e fundacion.
Sra. Irena Gomes a dedica gran parti di su bida na e labor di cuido social. Despues di a traha pa varios aña den e mesun ramo na Hulanda, e a regresa Aruba unda e tin mas di 9 aña ehecutando e trabou aki cu e mesun amor, pasion y dedicacion. Su trabou diario ta enfoca riba yuda y guia personanan vulnerabel, di e status di asylzoekers te cu personanan cu mester di respaldo y guia social continuo, den colaboracion cu diferente instancia.
Segun Sra. Gomes a relata, e suceso a tuma luga siman pasa durante e actividad cerca di su fundacion. E momento ey, un discusion y engrenaje fuerte a seya entre dos cliente di e fundacion. Ora cu e situacion a escala, un di e clientenan a saca un obheto ,un boter di hero y a cuminsa zwaai cu ne den direccion di e otro persona.
Como parti di su rol di proteccion y intermediacion pa evita cu e situacion ta sali for di man of cu un persona ta resulta herida, Sra. Gomes a interveni mesora. Durante e intento pa calma e situacion y desarma e cliente, e a logra kita e obheto for di e persona. E obhetivo primordial tabata pa proteha tanto e clientenan mes como e personanan den e cercania.
Lamentablemente, un persona cu tabata presente a graba e momento ey sin comprende e contexto completo di e intervencion. Na luga di busca aclaracion of puntra kico tabata sosodiendo, e material a wordo publica riba rednan social y despues difundi pa medionan di noticia, generando un reaccion di spanto y malcomprension den e comunidad.
“Mi ta haya hopi lamentabel cu e cos a bay asina. E persona no a baha pa puntra kico a sosode realmente, sino cu a opta pa manda e video riba Facebook,” Sra. Gomes a expresa cu preocupacion.
E difusion aki a trece consecuencianan serio pa e trabou cu Sra. Gomes ta realisa pa e fundacion y pa e clientenan cu ta depende di e cuido aki. E ta enfatisa cu su unico intencion semper tabata y ta pa yuda y proteha e ser humano den necesidad.
“Mi no sa mes con pa haci hende daño. Mi ta stima hende y mi kier yuda nan,” Sra. Gomes a conclui, mi mester di aclaria e situacion pa asina por sigui brinda e apoyo y cuido tan necesario na e comunidad vulnerabel di San Nicolas.