Wardakosta di Karibe na Boneiru

Resientemente nos a konstatá huntu ku STINAPA i MMHB (Tim Multi Disiplinario di
Boneiru) ku komportashon di boto i Seadoo por bira peligroso den sierto área nan.
Esaki ta tuma lugá na diferente parti di Boneiru manera entre otro; Klein Bonaire, Te
Amo Beach, Donkey Beach, Havengebied (área di haf), Cha Cha Cha Beach, Spice
Beach i besindario. E Tim Multi Disiplinario ta konsistí di; Duana, Koninklijke
Marechassee, Wardakosta, Korps Politie Caribisch Nederland (KPCN) i Openbaar
Lichaam Bonaire (OLB).
Nos ke kòrda tur doño di boto y Seadoo, ku ta obligatorio pa tin tur dokumentashon ora
ta nabegá riba laman. Esaki ta konsistí di un karchi di registrashon i tambe e vaar
vergunning bálido. Tambe nos ta pidi tur boto i Seadoo pa tene konsiderashon ku
sambuyadó i bishitantenan di laman i tur playa di Boneiru. E velosidat permití pa
nabegá den área di Parke Nashonal Marítimo ta un máksimo di 10 kilometer pa ora (5.4
kònòpi).  E parke nashonal ta kuminsá for di e 'hoogwaterlijn' te ku 60 meter di
profundidat i por lo ménos 75 meter for di kosta.
Nos ta pidi kooperashon di bishitante nan di laman pa tuma nota di number di
registrashon di boto òf Seadoo (B-number) na momento ku nan ripara algun
komportashon peligroso riba laman. Por mèldu tur situashon peligroso na personal di
Wardakosta via di 913 òf WhatsApp +5999-510 0913, òf tuma kontakto ku HVI of
STINAPA.
STINAPA ta disponibel via di +599 – 7778444 tur dia for di 6 or di mainta te ku 9 or di
anochi. Por fabor manda informashon kompleto ku deskripshon di e insidente, number
di registrashon di e boto, portrèt i òf video pa asina por registrá i investigá e kaso mas
bon ku ta posibel.
Adishonalmente, den kuadro di seguridat riba laman, si un boto sali for di Aruba òf
Kòrsou den direkshon di Boneiru i ta eksperensia problema nan di motor òf problema
tékniko, nos ta konsehá lo siguiente. Si e boto ta mas serka di Kòrsou, bai bek Kòrsou.
Si e boto ta mas serka di Aruba, bai bek Aruba. Si a sali for di Aruba den direkshon di
Boneiru na momento ku eksperensia problema nan ku motor, i e boto ta mas serka di
Kòrsou, por fabor bai Kòrsou pa asina atendé ku e problema.