Riba diamars 4 di november venidero lo lansa e proyecto di scol “Choices matter, so do you” na un forma festivo na Universidad di Aruba.
E programa inovativo aki a wordo desaroya riba iniciativa di Ministerio Publico, en cooperacion cu Universidad di Aruba y cu bureau Diversion, cu ta specialisa den desaroya programanan educativo tocante temanan cu ta toca comunidad.
Na Hulanda tin un programa parecido, diez aña caba, bao di e nomber “Wie grijpt in?”
E iniciativa “Choices matter, so do you” ta dirigi riba alumnonan di Ciclo Basico di varios scol secundario.
E ta duna nan un chens pa drenta den combersacion cu otro tocante cuestionnan actual, bao guia di peer educatornan di Universidad di Aruba y den cooperacion estrecho cu Ministerio Publico.
E lansamento lo tuma lugar diamars awor di 4 pa 6’or di atardi den aula di Universidad di Aruba.
E procurador-general lo hiba palabra na e ocasion y lo papia tocante e importancia cu e proyecto aki tin pa Ministerio Publico.
Usualmente e enfoke di Ministerio Publico ta riba e acercamiento penal, mientras cu den e proyecto aki e enfasis lo ta riba yega na e hobennan y riba prevencion pa medio di educacion y concientisacion.
Di banda di Universidad di Aruba, Ruth Bonnevalle, coordinador di proyecto y docente principal di Derecho Penal y Procesal Penal, lo elabora encuento e rol di studiantenan como peer educator den e proyecto “Choices matter, so do you”.
A invita directornan y docenten di 13 scol secundario tambe riba diamars y lo introduci e peer educatornan y revela e logo y slogan.
Manager di proyecto Juliette van Romondt a bisa: “Cu Choices matter, so do you, nos ta duna hobennan un chens pa haci conoci cu estado di derecho, cu ley y cu e parti cu nan mes ta hunga den esaki, na un manera interactivo, tanto pa nan mes como pa comunidad”.
El a sigui bisa: “Tur mayor y docente ta wak cu hobennan ta wordo influencia constantemente. Social media y presion di grupo ta hunga un rol grandi. Nos kier fortifica e resilencia, percura pa hobennan sigui pensa tocante escogencianan y consecuencianan, y keda participa den comunidad”.
E programa lo start na november 2025 na scolnan secundario na Aruba y lo dura en todo caso e dos añanan escolar cu ta bin.
A organisa recientemente sesionnan di informacion cu scolnan pa percura cu e material di les ta cuadra cu e experiencia di alumnonan di Aruba.
E programa lo ta na Papiamento, Hulandes y Ingles.
Despues di e parti oficial lo sigui un recepcion y lo tin oportunidad pa invitadonan y prensa papia cu e manager di proyecto y docentenan di Universidad di Aruba, como tambe cu fiscal di Husticia señora Paesch.
Press release: Openbaar Ministerie Aruba