Anthony “Tony” Weber ta e kandidato pa bira diputado na nòmber di frakshon di M21. Tony Weber tin 37 aña i el a nase na Sint Maarten. El a bai skol avansá na Kòrsou i na Universidat Erasmus na Rotterdam el a optené su diploma di Master den Atministrashon Públiko. Na Den Haag el a atkerí eksperensia polítiko, entre otro komo kolaboradó di frakshon den Tweede Kamer. Aktualmente Weber ta sekretario den direktiva di M21. Anteriormente Weber a traha komo konsehero di maneho pa entidat públiko Boneiru na departamento di Personal i Organisashon. Awor akí e ta empleado na RIEC CN, kaminda e ta ehersé e funshon di ‘accountmanager’, i mas aleu ku regularidat e ta aktua komo hefe di de-partamento interino. Su konosementu di finansa públiko el a optené entre otro komo empleado di Kontrolaria General di Kòrsou.
Enrikesimentu pa gobièrnu
“Nos ta sumamente kontentu ku Tony a pone su mes disponibel pa asumí e tarea pisá akí i pa bai realisá M21 su idealnan den Kolegio Ehekutivo”, segun lider di partido Daisy Coffie. “Ku su bèkgrount akadémiko, su konosementu di e arena polítiko na Kralendijk i Den Haag i su aserkamentu direkto, al kaso i práktiko, e ta un enrikesimentu pa gobièr-nu di nos isla.” Anthony Weber mes ta haña ku ta un honor grandi ku e tin mag di desempeñá e kargo di diputado: “Mi ta mira esaki komo un vokashon, no komo un profeshon. M21 tin ideanan hopi klarito tokante gobernashon transparente i mehorá. Mi ta orguyoso ku e partido tin konfiansa den mi kapasidat.” E intenshon ta pa nombra e diputado nobo durante e reunion spesial di toma di desishon di Konseho Insular ku nan a konvoká pa dia 14 di ougùstùs 2025 pa 19:00 or den Passangrahan.
