Pa e próksimo tres simannan, ingenieronan militar lo trein na Kòrsou i Aruba. Mas ku 100 militar hulandes lo partisipá na e ehersisio anual di Caribbean Engineer. Durante e ehersisio, nan lo realisá trabounan na sitionan di Defensa i yuda konstruí klasnan pa e Fundashon Futuro Brillante.
E personal militar Hulandes di “105th Engineer Company” lo trein nan habilidatnan tékniko i funshonamentu den ekipo na Kòrsou i Aruba durante e proksimo simannan. E ehersisio anualmente programá aki ta ofresé e ingenieronan e oportunidat pa konstruí i inová bou di kondishonnan tropikal, poniendo nan konosementu i abilidatnan di konstrukshon na prueba. Durante nan estadia den Caribe, nan lo traha na diferente lokalidat riba proyektonan tékniko ku no solamente ta fortalese nan propio habilidatnan pero tambe ta kontribuí na komunidat. Durante edishonnan anterior di Caribbean Engineer, e sòldánan a konstruí un post di warda pa Carmabi na Shete Boka, un toren di vigilansia riba flamingo den e reserva natural Hermanus, i nan a lora manga tambe na e skol Kolegio Chaya Willems.
E aña aki, e militarnan na Kòrsou ta yuda Fundashon Futuro Brillante konstruí klasnan adishonal. Nan ta ekstendé un rampa di boto na Base Naval Parera, renobando pòstnan di warda na Wacao, i proveéndo un afdak na e tereno di tiro di Daou pa asina e entrenamentu por tuma lugá bou di tur kondishon di wer. Na Aruba e ingenieronan ta trahando for di Kazèrne di Marina na Savaneta. Einan, nan ta mehorando un waf y desmantelando un rampa di boto, entre otro. Instalashonnan na e kazèrne tambe ta wòrdu renobá, usando krannan pisá.
Den e próksimo simannan, regularmente lo mira e ingenieronan na Kòrsou i Aruba ku ‘excavator’ mashin pa koba, truck, grua, i mashin pa koba. E ekiponan grandi i importante aki a wòrdu mandá for di Hulanda pa Caribe pa asina e militarnan por ehekutá nan tareanan optimalmente. Bou di kondishonnan tropikal, nan lo praktiká nan abilidatnan, oumentá nan posibilidat di keda desplegá, i kontribuí na e infrastruktura i e komunidat, fortalesiendo mas ainda e seguridat i resiliensia di e islanan.