Durante di e reunion a interkambiá i dialogá huntu ku Minister di Hulanda sra. Ingrid van Engelshoven, Ministernan di Aruba sr. Armando (Rudy) Lampe i sra. Xiomara Maduro i Minister di Sint Maarten sr. Rodolphe Samuel. Esaki tabata e di tres reunion ministerial. Meta di e reunionnan akí ta pa fortalesé e lasonan entre e paisnan, sostené i fortifiká otro den e diferente trabounan i yega na solushon konhunto pa retonan ku e paisnan den Reino ta konfrontá. Den su introdukshon Minister Croes a enfatisá e importansia di koperashon, tambe riba nivel di Reino. E reunion Ministerial akí ta prueba ku kolaborashon ta posibel i ku huntu nos por logra muchu mas riba tereno di enseñansa i kultura pa nos paisnan.
E reunion di 7 yanüari último tabata repartí den dos seshon, esta 1) Kultura i Enseñansa i 2) Siensia. Puntonan ku a keda tratá den e seshon di kultura tabata: institushon di un fondo pa kultura dirigí riba investigashon kultural; preparashon pa ratifiká i implementá e Tratado di UNESCO 2001 ku ta hasi posibel pa manehá i protehá e patrimonio marítimo di e parti di Reino den Karibe mas mihó; preparashon pa yega na un lista riba nivel di Reino pa herensia kultural tangibel. Riba petishon di Minister Croes a akordá pa pone un fecha konkreto pa lanta e Fondo di Kultura mas pronto posibel. Tambe el a pidi pa laga kada pais traha nan propio lista di herensia kultural tangibel promé i a base di esei yega na un lista riba nivel di Reino, lokual tambe a keda aprobá pa e otro ministernan.
Den e seshon di enseñansa a trata akseso na e biblioteka digital di Reino ku ta posibel for di mei 2020, stimulashon di edukashon/formashon pa dosentenan, e problemanan relashoná en konekshon ku estudionan na Hulanda. Un otro tópiko tabata Hulandes komo idioma estranhero den enseñansa den e parti di Reino den Karibe. Minister Croes a pidi pa promové aseso na e biblioteka digital di Reino mas tantu mirando ku tur hende ku ta miembro di Biblioteka Nashonal tin akseso na 28.000 ebooks i 2000 buki oudio. Tambe pa e paisnan ban traha huntu na un método pa Hulandes komo idioma estranhero, mirando e nesesidat ketu bai di esaki den enseñansa. Alabes el a trese diferente proposishon pa mehorá e preparashon di nos studiantenan promé ku nan sali pa bai studia na Hulanda.
Minister Croes ta satisfecho ku tur e puntonan ku el a trese dilanti di parti di Kòrsou a keda aseptá pa e otro ministernan. E ta mira bèk riba un reunion fruktífero ku ta stimulá un desaroyo positivo i un mihó kolaborashon entre e 4 paisnan den Reino Hulandes riba tereno di enseñansa i kultura. Kada pais ta sigui traha riba e palabrashonnan den e respektivo gruponan di trabou pa sigui kanalisá e trahamentu huntu den Reino pa ku e temanan di Enseñansa, Siensia i Kultura.
