Diamars mainta Minister di Turismo y Salud Publico sr. Dangui Oduber conhuntamente cu CEO di Aruba Tourism Authority (ATA), sra. Ronella Croes, tambe parlamentario, sr. Alvin Molina, y e representante di San Nicolas Business Association, sr. Errol De Freytas, a hiba algun palabra den e conferencia di prensa pa e proyecto di “Baby Beach”.
E conferencia di prensa tabata pa anuncia cu e “Fase 2” di e Masterplan pa e area di Sereo Colorado a wordo finalisa. Den e masterplan di Seroe Colorado, e proyecto nan manera Baby Beach y Rodgers Beach lo haya nan “upgrading” y cu esaki a hasi un inversion importante pa Aruba, cu lo haci un impacto grandi pa e districto di San Nicolas.
Fase 2 a consisti di un construccion di parkeo completamente nobo, bunita landscaping, tambe un turtle wall nobo, unda a hala esaki mas atras y yena e area cu santo blanco pa asina haci e area di beach mas grandi y tambe a reconstrui e trapi di Baby Beach cu tabata deteriorando. A inclui iluminacion, landscaping y tambe systema di irigacion.
E Fase 2 di e proyecto aki ta pa eleva henter e area rond di e playanan di Baby Beach pa asina nos localnan y turistanan por disfruta di dje.
Pronto, dentro di e prome cuartal di aña 2023, gobierno lo anuncia e destaho publico di Fase 3 di e proyecto. Den e fase aki lo renoba e 2 tennis court, tambe lo traha riba un court multifunctional cu por wordo uza pa por ehempel beach tennis, beach volley, beach soccer y otro tipo di deportenan. E gazebo mei mei di e tennis courtnan lo bira un restaurant y lo bay tin bañonan publico pa tur bishitante. Lo pone tambe dos kiosko caminda hende por pasa cumpra cuminda y/of bebida. E meta ta pa e kioskonan aki refleha e cultura Arubano y bende cumindanan cu ta tipico den e area di Caribe.
Minister Dangui Oduber ta enfoka cu turismo ta e driver di nos economia y pesei su maneho ta pa sigui desaroya cu embeyesimento den un manera sostenibel y alaves teniendo na cuenta e importancia di conserva nos naturalesa.
Minister Oduber ta gradici ATA, DOW, DIP pa e bon cooperacion pa por sigui cu e bunita proyecto pa San Nicolas y duna un balor agrega na producto Aruba.
Finalmente Minister Oduber ta hopi satisfecho di mira con su vision ta cristalisando. Un vision sin accion no ta un vision.
