No ta mucho dia despues di e publicacion di conseho di CAFT riba e di tres ‘uitvoeringsrapportage’ di gobierno, Minister President di Aruba ta sali anuncia publicamente, cu e cumplimento cu exigencianan cu el a firma p’e di landspakket, ta bira casi imposibel.
Dia 31 di augustus ultimo ya conseho di CAFT tabata critico riba e hecho cu e di tres rapport di ehecucion di gobierno, no ta duna un bista suficiente cla pa CAFT por midi si e recortenan den gasto personal di gobierno ta tumando luga manera debe ser.
Na mes momento, ta obvio cu e preocupacion grandi di CAFT ta tambe e cumplimento cu e recortenan den AZV cu gobierno mes a bay di acuerdo cu’ne di 60 miyon pa aña.
Mientras cu Minister di Salubridad ta informa CAFT por medio di un carta cu nan ta spera di yega un recorte di 40 miyon den salubridad e aña aki y rapport di AZV riba e progreso di aña 2021 ta papia di 36 miyon, CAFT ta repetitivamente recorda nan, cu nan tin e obligacion di cumpli cu e 60 miyon manera palabra pa 2021.
Cu gran asombro, comunidad por a tuma nota cu e siman ultimo aki, Minister President ta sali publicamente anuncia cu e no ta pensa cu lo por cumpli cu locual el a bay di acuerdo cu’ne pa loke ta recorte den salubridad y dado sea e caso y cu esaki trece retonan cu Hulanda, Aruba lo bolbe haci fiansa riba mercado local.
Un declaracion cu sigur Hulanda no por ta contento cu’ne y alabes un declaracion cu a trece hopi pregunta y discordia den comunidad.
Con por ta cu Aruba ta caba di anuncia re-financiamento cu Hulanda na un miho interes algun siman atras y awor ta considera haci otro fiansa local pa motibo di su mesun incumplimento cu Hulanda. Preguntanan ta entre otro, fiansa di ken? Na cuanto porciento ? Pa cuanto tempo y na ken su boluntad Aruba lo mester bay biba pa por haci e fiansa aki?
Mas absurdo ta e hecho cu Secretario di Estado ta menciona den declaracion despues di ultimo Rijksministerraad cu Aruba a bay di acuerdo “zonder voorbehoud” y awo esun cu a firma e acuerdo pa gobierno, ta cuminsa anuncia e inicio di incumplimento cu landspakket.
No solamente e hecho ta obvio cu falta capacidad pa negocia y negociasionnan ta leu di e realidad pero tambe cu e situacion aki ta empeorando nos pais dia pa dia, cual ta sumamento preocupante.
Cu of sin un anuncio di e continuacion di gobierno di mesun signatura, Aruba no tin un perspectiva cla pa futuro.
Mas preocupante ta bira e hecho cu den e conseho di CAFT ta menciona tambe di ta descontinua cu e idea di asistencia cu a wordo anuncia dor di e minister bou capa di TIO algun luna atras pero no ta duna un bista tampoco di un maneho concreto con Aruba lo asisti e grupo den necesidad aki despues cu FASE y Loonsubsidie finalisa.
Temponan dificil nos dilanti, unda cu Hulanda ta conta riba confiansa y acuerdo y awor lo haña oportunidad su mes pa midi complimento di palabra di e “gobierno di integridad”di Aruba.