Durante e presentacion di e buki nobo cu ta trata e historia di Willem Rasmijn y e kentura di oro na Aruba, e lider di fraccion di Partido Patriotico di Aruba (PPA), Eduard Pieters, a expresa su mas sincero pabien y sosten na e autor local Edgar “Eddy” Ras y su señora casa, Marjory.
Pieters a resalta e balor di e narrativa di e buki, cu ta explicita via e bida di un mucha manera e antepasadonan Arubano tabata biba y e momento clave ora a descubri oro den Rooi Fluit. E obra ta mustra con e revolucion economico aki, pa medio di e extraccion y exportacion di e mineral precioso, a transforma e bida di e ciudadanonan di e epoca ey y a keda marca e desaroyo di e isla.
Bistiendo su pechi como pedagogo, Peter Pieters a subraya e impacto educativo cu e buki aki por tin pa e generacion nobo. Segun e lider di PPA, e buki ta presenta e historia di un forma simpel y accesibel cu por yuda e muchanan compronde kico e antepasadonan a pasa den pasado.
Debi na e balor historico y dedicacion aki, Pieters a haci un apelacion pa Gobierno di Aruba haci bon uzo di e publicacion aki y hacie accesibel pa tur maestro di scol, permitiendo cu nan por integr’e den nan lesnan y conta e historia di Willem Rasmijn.
“Un pais cu no sa su historia, ta condena pa repiti e errornan di pasado,” Pieters a enfatisa, marcando e importancia di preserva memoria colectivo di e pueblo.
Na nomber di e fraccion di Partido Patriotico di Aruba, Eduard Pieters a felicita Eddy Ras pa e logro literario aki, garantisando cu e buki lo bay haya un espacio hopi special den nan curason y den e partido.
