Diamars atardi Minister Endy Croes a ricibi e atletanan di Gihae Gymnastics na aeropuerto Reina Beatrix pa felicitanan pa nan tremendo logro den e competencia di Copa Candy Party 2022 cu a tuma luga na Panama. Un total di 723 gimnasta a competi di 25 club di seis pais: Ecuador, Colombia, Costa Rica, Guatemala, Panama y Aruba. E 18 atletanan cu a representa Aruba a logra di conkista un total di 55 medaya; incluyendo 16 medaya di oro, 15 di plata, 1 di brons, 7 medaya di 4 luga, 8 medaya di 5 luga, 1 medaya di 6 luga y 5 medaya di Explorers. Tambe Gihae Gymnastics a logra obtene 11 trofeo cual 4 ta 1 luga, 4 ta di 2 luga, 1 di 3 luga y 2 ekipo na 1 lugar. E competecian tabata uno di nivel y atletanan a representa Aruba dignamente.
Minister Endy Croes ta felicita e atletanan pa nan excelente presentacion y pa laga Aruba su nomber briya den exterior. Tambe ta gradici e coachnan sr. Jimmy Palma Villegas y sra. Himilice Casares como tambe e mayornan pa sostene nan yiunan den nan deporte. Masha pabien!
