Durante e conferencia di prensa di partido RED Democratico pa prome biaha a papia di caida di Gabinete Wever Croes, cu a tuma luga dia 30 di maart ultimo.
Den e conferencia di prensa tabata presente lider di partido Ricardo Croes, minister di Red Dr. Rudy Lampe y presidente di RED Kinsasha Thielman – Van der Bliek.
Minister Rudy Lampe a papia di e vision y mision di partido RED ora cu a dal e prome paso casi 20 aña pasa. E tempo ey a organisa un simposio na Universidad di Aruba titular Rechtmatig & Doelmatig Openbaar Bestuur. Un gobierno cu ta respeta ley y placa di placa, cu ta nan punto di salida y esey tabata prome cu RED a participa den un eleccion. Nan prome programa di gobernacion, el a splica, a hiba e titulo Na caminda pa un Isla di Integridad. “E tempo ey caba, na 2005, a papia di lanta bureau integriteit. Na 2017 parti di e programa aki a forma parti di esun di gobernacion, danki na esfuerso di sr. Ricardo Croes. Den e programa di gobernacion di 2017 ta papia di Bureau Integriteit cu ta den proceso di wordo realisa awe.”
Na momento cu a drenta gobierno, minister Lampe a bisa, a drenta cu e filosofia pa tin un isla di integridad. “Pero ora bo ta papia di integridad, bo ta paga un prijs. E prijs di popularidad. Integridad no ta paga pasobra bo tin cu bay coregi loke ta contra ley. Asina nos a bira minister, a denuncia corupcion na Enseñansa pa Empleo y EPB, unda nos mester a interveni. Tabatin iregularidad na OAA, unda nos mester a interveni. A haci esey pasobra nos kier un gobierno cu ta respeta leynan y cu no ta tolera loke ta ilicito.”
Tambe RED a traha pa tin un gobierno unda ta haci uzo eficiente di placa di pueblo. P’esey den un aña a stop malgastamento di placa den enseñansa cu 8 miyon y a inverti esaki den innovacion. Placa di pueblo t’ey pa sirbi pueblo y pa enseñansa esaki ta encera sirbi e muchanan cu ta bay traha den un mundo diferente cu esun actual. Enseñansa personal, haciendo uzo di talento di e muchanan y duna nan tur e herment digital ta loke a traha riba dje den enseñansa.
Di otro banda, si tin edificio bandona, pakico huur otro edificio. Si huur un edificio, e lo ta malgastamento di placa. “Ora bo ta para pa integridad, esey tin su costo. Tabatin protesta y manfiestacionnan. E origen di esaki tabata pasobra RED kier ta diferente, goberna di un forma diferente, tuma decision corecto, sin pensa na gana of perde voto. Nos kier aleha di e politica popular cu ta esun cu ta gana voto.” El a enfatisa cu e no ta contra ningun trahado, tampoco esnan na SKOA. Pero mester bisa cu e directiva di e stichting aki a nombra grupo di persona sin base legal. Gobierno ta duna subsidio pa tur trahado di limpiesa, pero SKOA a haci algo ilegal. Esaki ta algo cu partido RED no por a acepta cu ta haci cu placa di pueblo. Awo e stichting ta den dal bancarota cu miyones di debe y door di decision ilegal a crea un debe miyonario. No sa tampoco con pa paga pensioen di e maestronan. “Nos a bisa cu nos ta bay goberna diferente, segun ley y respetando placa di placa. Esey nos a haci.”
Dia 25 di juni awo pueblo mester vota pa un partido cu ta para pa ley y ta respeta placa di pueblo y no pa esnan cu kier keda popular, tumando decision popular. “Nos a demostra cu nos por goberna diferente, goberna cu integridad.”