Lider di frakshon di MPB Elvis Tjin Asjoe a deskribí mucha komo e tesoro mas presioso di un famia. E okashon di su diskurso tabata e reunion di Konseho Insular solèm en konekshon ku selebrashon di ‘Dia di Boneiru’ djamars mainta.
“Mucha ta símbolo di speransa, puresa i inosensia. Mucha ta e pret’i wowo di nan mayornan. Meskos ku un famia ta pèrkurá pa kuida, guia i garantisá bienestar di su miembronan, meskos ta konta pa e responsabilidat ku kada un di nos tin aki komo representantenan di pueblo, sea ta den Konseho Insular òf den Kolegio Ehekutivo”, segun Tjin Asjoe.
“Nos muchanan di awe ta e Boneiru di mañan pa esei e mucha mester di un kas. E mucha mester lanta den un kas kaminda tin rèspèt, harmonia, hopi amor i ku disiplina. E mucha mester lanta sin preokupashon kiko ta bai kome mañan, pasobra e kas su pòtmòni no ta yega te ku fin di luna. Mihó trabou pa mayornan dor di formashon. E mucha mester por lanta den un kas ku mayornan no ta gasta sèn na ko’i kèns. E mucha mester lanta huntu ku su mayornan i no ku bisiña, pasobra mama mester traha dos trabou”, segun Tjin Asjoe.
Tambe Elvis Tjin Asjoe a bisa ku mester tin sufisiente kas pa kada mucha por biba aden. Aki el a referí na e proyekto di 500 kas ku FCB a bini kuné i akuerdo di mas di 200 kas mas. Mester di 1800 kas mas. Maneho di tereno ku kada ken por yega na nan mes kas i hogar ta esensial.”