Durante e plan di fakansi di Indebon, Let’s Move i Jong Bonaire, 90 mucha a partisipá na tayernan di kushinamentu di Nature Cooking School Bonaire. GGD Bonaire / Salubridat Públiko a hasi e tayernan posibel. Nan a tuma lugá di 6 te ku 9 di yüli.
Durante aña eskolar, diariamente GGD Bonaire / Salubridat Públiko ta parti fruta pa muchanan na skol i ta stimulá nan pa hasi eskoho saludabel relashoná ku nutrishon i moveshon. Ta importante ku ta sigui duna e atenshon akí pa un estilo di bida saludabel durante fakansi tambe. P’esei a desaroyá e programa akí spesialmente pa entretené muchanan na un manera dibertido, aktivo i edukativo ku temanan di salú.
E muchanan a siña di unda kuminda ta bini, kosechando i rekogiendo nan mes ingredientenan ku por haña den nan bisindario. Despues huntu nan a prepará kuminda lokal saludabel. Asina na un manera práktiko i dibertido nan a sera konosí ku e importansia di kuminda saludabel.
Danki na tipo di kolaborashonnan asina, muchanan ta haña oportunidat pa desaroyá abilidat nobo, keda aktivo i na mes momentu gosa di un fakansi signifikante. Ku e inisiativa akí, GGD Bonaire / Salubridat Públiko ke stimulá muchanan pa durante fakansi di skol tambe hasi eskoho konsiente ku ta kontribuí na nan bienestar.
