Frakshon MAN-PIN den Parlamento ta ekspresá su gran preokupashon pa motibu ku gobièrnu no a subi e penshun di AOV e último 4 añanan. Na momento ku tin kresementu ekonómiko real mester subi e penshon di behes, konforme di lei di AOV.
E lei di AOV ta papia palabra kla: Konforme artíkulo 7 di e lei (“Landsverordening Algemene Ouderdomsverzekering (AOV)”), gobièrnu mester subi e penshun di behes (AOV) basa di kresementu real di ekonomia. Mester hasi esaki tur aña pa e fecha di 1 di yanüari.
Sifranan di CBS ta mustra ku den e añanan 2021, 2022, 2023 i 2024 Kòrsou tabatin un kresementu ekonómiko real. Sinembargo, gobièrnu no a subi e AOV konforme lei.
No por konsiderá e “toelage” ku gobièrnu ya pa hopi aña kaba ta paga na kobradónan di AOV lokal komo kumplimentu ku e obligashon legal. Esaki, pasó adaptashon di e penshun AOV segun lei ta konta pa tur kobradó di AOV.
Esaki ta nifiká ku for di 2022 pa awor aki penshun di behes, entrante 1 di yanüari 2025, mester a yega 1.051 florin pa luna. Esaki ta nifiká ku Gobiernu debe kada kobradó di penshun behes, esta AOV alrededor di 6 mil florin.
Ta opvio ku si a ahustá e AOV for di 2022, ora asin’aki nos kobradónan di AOV tambe por a dil mihó ku e subida haltu di preis di kuminda i konsekuentemente biba un bida mas digno.
Frakshon MAN-PIN a dirigí preguntanan na minister di SOAW, sra. C. America-Francisca, i ta urgi esaki pa kumpli ku e lei di AOV i sòru pa e subida obligatorio di penshun di nos hendenan grandi, for di 1 yanüari 2022. “Nos ta papia di un obligashon pa lei ku no ta duna márgen pa interpretashon. Nos ta pidi gobièrnu pa kumpli ku e derechi di nos penshonadonan pa subi e penshun basa riba kresementu ekonómiko real.”
MAN-PIN ta pidi pa gobièrnu tuma su responsabilidat na serio i kumpli mesora ku e lei. I asina, dor di sòru pa e subimentu obligá di e AOV, gobièrnu ta kontribuí na drechamentu struktural di e penshun di hendenan ku a dediká nan bida pa konstruí nos país.