Como parti di e proyecto di renobacion di palapa y banki, Aruba Tourism Authority (A.T.A.), den colaboracion cu ACE Engineering, ACF, DOW y ALBO, a completa diamars dia 8 di juli, e trabou na Boca Catalina / Malmok. Esaki ta trata di e reemplaso di seis banki y tambe e mantencion di diesun banki di cement ya existente.
E iniciativa aki ta un paso importante como parti di A.T.A. su esfuersonan continuo pa mehora seguridad publico y tambe mehora e experiencia di bishitantenan na e playanan di Aruba. Un residente local, cu ta bishita Boca Catalina / Malmok tur dia pa relaha, a mustra hopi aprecio pa e bankinan. E la comparti cu atardi ta hopi druk na e sitio y hopi hende ta reuni pa disfruta di e bista espectacular cual ta e bahada di solo. E bankinan nobo awor ta haci cu mas hende por disfruta di momentonan special banda di lama na un manera mas comfortabel.
E proyecto tin su plan di mantencion pa largo plazo cu ta garantisa cu e facilidadnan lo keda den bon condicion pa uzo continuo di e publico. A.T.A. ta orguyoso di ta contribui na proyectonan cu ta proteha e herencia natural di Aruba y ta promove e uzo responsabel di nos espacionan na nos costa. Tambe mester menciona cu na Mangel Halto e “fase 2” di e proyecto ta andando cual ta e instalacion di palapa nobo. Bankinan nobo lo sigui den poco tempo.
A.T.A. ta pidi e comunidad pa yuda cuida e facilidadnan nobo pa uzo y bienestar di nos comunidad y di tur cu ta bishita.
