.
Tourism Corporation Bonaire (TCB) huntu ku Bonaire
International Airport (BIA) i Bonaire Hotel and Tourism Association (BONHATA) dia 3
di aprel 2024 a organisá e promé Bonaire Tourism Update pa aña 2024 den Captain
Don’s Habitat.
Veroesjka de Windt, direktor di BONHATA, ta mèldu ku e grado di okupashon den e
promé kuartal di 2024 ku 74% a keda igual ku aña 2023. Luna di yanüari su
komienso a bai pokopoko, luna di febrüari a keda meskos, miéntras ku luna di mart a
mustra un subida di 4%. Pa e di dos kuartal ta spera un oumento di 11% pa loke ta
trata e grado di okupashon. Kompará ku aña 2023 e Tarifa Promedio di Dia (ADR) a
baha ku 7%, di $239 na aña 2023 pa $223 na aña 2024. Esaki ta konsekuensia di
introdukshon di mas kamber nobo na nos isla sin sufisiente kapasidat di buelo. Debí
na esaki a baha preis pa por a yena e kambernan. Pa e di dos kuartal ta spera un
bahada di 12%, di $201 na aña 2023 pa $177 na aña 2024. Konsekuentemente
tabatin un bahada di e RevPar (e entrada pa kada kamber disponibel) di 6% den e
promé kuartal di aña 2024, di $180 na aña 2023 pa $170 na aña 2024. E pronóstiko
pa e di dos kuartal un biaha mas ta mustra un bahada di 9%, di $112 na aña 2023
pa $102 na aña 2024.
Maarten van der Scheer, direktor di BIA, a konstatá un oumento remarkabel di e
kantidat di buelo i pasahero for di Nortamérika: “Nos esfuersonan konhunto pa atraé
mas tráfiko aéreo for di Nortamérika a duna hopi bon resultado. Asta den un
ambiente sumamente kompetitivo nos a logra oumentá e kantidatnan akí den liña ku
e Plan Stratégiko pa Turismo. Den e promé kuartal e kantidat total di pasahero na
Aeropuerto Flamingo a subi ku 6,8% kompará ku e mesun periodo na aña 2023. E
kantidat di pasahero internashonal a subi ku 7,8%, miéntras ku e kantidat di
pasahero entre e islanan a oumentá ku 4,3%. Resientemente nos a selebra
inougurashon di un kapa nobo pa tapa solo i áwaseru na momentu di yegada, un
proyekto pa mehorá eksperensia di pasahero. E aña akí nos plan ta pa ehekutá
diferente proyekto di mehorashon, entre otro konstrukshon di un parke solar,
realisashon di un sistema nobo di iluminashon na aeropuerto i instalashon di rutanan
nobo di siguridat.”
Miles Mercera, direktor di TCB, a kompartí e resultadonan preliminar for di kua a
resultá ku na luna di mart 2024 Boneiru a yama bon biní na 18.269 bishitante
stayover. Ta atribuí resultado di e promé kuartal na ampliashon di e servisionan di
diferente kompania di aviashon prosedente for di Merka i e oferta èkstra di asiento di
kompanianan di aviashon entre e islanan. Durante e promé kuartal di aña 2024 TCB
a partisipá aktivamente na vários evento, entre otro Vakantie Expo, ITB, DuikVaker,
Travel & Adventure Show NY i Toronto Outdoor Adventure Show. TCB tabatin
diferente kampaña tambe ku partnernan manera KLM, United Airlines, ReisPro i
PSV, djis pa menshoná un par. A duna tambe un bista general kòrtiku di e
eventonan ku ta na kaminda, manera SeaTrade, Travel Counsellors i CHTA
Marketplace. Finalmente a duna tambe un bista general di e próksimo biahenan di
prensa i posibilidatnan di relashonnan públiko pa e merkadonan norteamerikano i
oropeo.
