Outo ta bòltu
Djaluna 25 di ougùstùs, alrededor di 2.30 or di mardugá, ‘meldkamer’ sentral a risibí notifikashon tokante un aksidente riba Kaya Korona, na altura di Mentor, di kua un outo a bòltu. Pa e motibu aki e shofùr a keda pegá den e vehíkulo. A dirigí polis, brantwer i ambulans na e sitio. A resultá ku e outo tabata direkshon nort riba Kaya Korona i a baha for di kaminda, dal den un bòrchi di propaganda despues di kua e outo a bòltu i keda riba su banda. Despues ku a saka e víktima for di e vehíkulo, a transport’é ku ambulans pa hòspital pa tratamentu médiko. E departamentu di tráfiko tambe a bini na e sitio pa investigá kousa di e aksidente. Debí na prioridat di kuido médiko, no por a hasi un tèst di supla ku e shofùr.
Aksidente entre outo i bròmer
Djadumingu 24 di ougùstùs, alrededor di 5.45 or di atardi, ‘meldkamer’ sentral a risibí notifikashon tokante un aksidente entre un outo i un bròmer na e krusada di Kaya Gepi i Kaya Korona. E shofùr di e bròmer a resultá heridá i personal di ambulans a hasi un chekeo médiko kuné na e sitio mes. E no mester a bai hòspital. Shofùr di e outo a haña but pa manehá sin seguro bálido. Konforme e maneho di ‘botsen is blazen’ a hasi un tèst di supla ku ámbos shofùr, ku resultado negativo.
Bo a mira algu sospechoso? Yama 717 8000 òf e liña di tep anónimo 9310.