Keho di ladronisia
Riba djadumingu 2 di novèmber polis a risibí keho di ladronisia di un kantidat di sèn na un instansia.
E sèn tabata warda den un kashi na lòk. Personal enkargá, ora a habri e kashi, a ripará ku e ènvelòp ku e sèn a desaparesé. Investigashon den e kaso ta andando.
Keho di ladronisia
Riba djadumingu 2 di novèmber a risibí keho di ladronisia di gasolin for di tanki di un boto di piskadó na un “slipway” na Bulevar J.A. Abraham.
E víktima a deklará ku djasabra promé di novèmber el a mará su boto den bon estado i a ser’é ku un lòk. Ora el a bolbe dia siguiente, a bin topa ku e lòk kibrá i e gasolin di e tanki a disparsé. Investigashon den e kaso ta kontinuá.
Keho di ladronisia
Riba djadumingu 2 di novèmber polis a risibí keho di ladronisia di un fatbike na un kas situá na Kaya Pos di Watapana.
E víktima a deklará ku el a parker e fatbike patras di kas anochi di djasabra 1 di novèmber i di lòk na kadena. E mainta siguiente e fatbike a desaparesé.
Ta trata di un fatbike pretu di marka Bikers Choice Helmet. E kaso ta bou di investigashon
Kandela den kas
Riba djadumingu 2 di novèmber, ‘meldkamer’ sentral a risibí notifikashon tokante un kandela den un kas na Washikemba.
Ora polis i brantwer a presentá na e sitio, a resultá ku bisiñanan i trahadónan di konstrukshon presente a paga gran parti di e kandela. E kandela a kuminsá dor di un bateria di mashin pa bora ku tabata kargando.
Brantwer a kontrolá e situashon.
Kòntròl riba velosidat na E.E.G. Boulevard
Riba djaluna 3 di novèmber 2025, entre 6:00 i 7:00 di mainta, polis a tene un kontrol di velosidat na E.E.G. Boulevard, na altura di Kaya Ir. Randolph Statius van Eps. Pa e kòntròl akí a usa un aparato di leser (lasergun). E límite di velosidat permití na e kaminda akí ta 40 km/h.
Durante e kontrol, polis a parti un total di shete (7) but:
* Kuater (4) pa pasá e límite di velosidat pèrmití
* Unu (1) pa no por a mustra un reibeweis bálido
* Unu (1) pa manehá sin seguro bálido
* Unu (1) pa no tin plachi di number ni dilanti ni patras
E velosidat mas haltu registrá tabata 82 km/h. Polis ta enfatisá riba importansia di manehá ku responsabilidat i pa respetá e límite di velosidat. Manehá ku hopi velosidat haltu ta oumentá rísiko pa aksidente di tráfiko i ta pone no solamente e shofùr, sino tambe otro usuarionan di kaminda den peliger.
Ladronisia den akomodashon di turista na Kaya Inglatera
Riba djaluna 3 di novèmber, alrededor di 3or di atardi, ‘meldkamer’ sentral a risibí notifikashon tokante un kaso di ladronisia den un akomodashon turístiko na Kaya Inglatera.
Deskonosínan a bai entre otro ku un telefòn, un lèptòp i diferente karchinan. Polis ta investigando e kaso.
Violensia públiko na Kaya Vibrafon
Riba anochi di djasabra promé di novèmber, ‘meldkamer’ sentral a risibí notifikashon tokante violensia públiko na Kaya Vibrafon. Polis ku a presentá na e sitio, a bin topa ku un hòmber ku ta deklará ku dos otro hòmber a maltrat’é físikamente.
E víktima a risibí herida i a risibí tratamentu médiko dor di personal di ambulans.
Polis ta investigando e kaso.
Press release: Korps Politie Caribisch Nederland