Tirabon a organisá un eksitoso kompetensia di tiru yamá kopa rotativo Arthur Mauricio.
Na e okashon aki i na inisio di e torneo, presidente di Tirabon a yama bonbiní na un i tur. Diputado di entre otro deporte, señor James Kroon i tambe ku hefe di Indebon, señor Terrence de Jongh a hiba palabra. Diputado a ekspresá su gratitut na direktiva di Tirabon ku ta dediká nan tempu i ta hinka nan energia den e deporte, i di forma boluntario pa sigui engrandesé e deporte di tiru na Bonaire. E mandatario a sigui bisa ku den pasado Tirabon a partisipá na práktika di e deporte di tiru riba nivel di selekshon internashonal pa hopi aña, a representá i saka kara di Bonaire na hopi okashon. P’esei ora e mira karanan hóben ta sigui tene deporte di tiru bibu, nos por sinti nos mes orguyoso di esaki komo
Bonaire.
Hefe di Indebon tambe a dirigí su mes na presentenan, Indebon ta sostené e deporte di tiru totalmente. Tipo di eventonan asina aki, evento ku ta trese kolektividat di un kantidat di hóben ku sea ta práktika e deporte ya kaba riba nivel federativo / kompetitivo. Òf ta den e trayekto pa drenta den un di e federashonnan internashonal pa asina praktiká deporte ku ta krea lider komo tambe ta krea un mihó persona pa nos sosiedat.
Diputado Kroon por último a bisa, e meta no ta únikamente pa hasi deporte so, sino tambe pa tene kuenta ku responsabilidat sosial, integrashon, sa di kompetí ku otro i tambe pa tene kuenta ku e parti di seguridat, norma i balor durante ku ta práktika e deporte di tiru. Pa klousurá e parti ofishal, diputado Kroon a deseá tur partisipante éksito ku e kompetensia. Na mes momentu el huntu ku famia di eks presidente señor Arthur Mauricio den felis memoria, a desvelá e bòrchi ku a duna honor na tereno, e kancha nobo di
Tirabon kual ku ta karga e nòmber Arthur Mauricio.
Señor Arthur Mauricio, den felis memoria, tabata na bida, presidente di Tirabon. Kual ku den su trayektoria el a nifiká hopi pa Tirabon, i tambe el a sa di keda lucha pa eksistensia di Tirabon. E idea di e kopa rotativo i tambe pa duna Tirabon su kancha nobo, e nòmber di Arthur Mauricio a nasé for di un miembro eksistente di Tirabon, kual ku ta señor Eric Soleana, esaki pa duna honor na Arthur komo apresio pa tur lokual ku el a nifiká pa Tirabon.
Seguidamente e Sekretario, i alabes komandante di kancha, Jadyr da Silva Piloto a hasi e asina yamá "veiligheidsbriefing" i pa despues e habri kancha pa 11or di mainta. Wer tabata parsialmente nublá. Bientu tabata generalmente for di direkshon ost i moderá te basta fuerte; Velosidat di Bientu: 14.6 Mia pa ora, Wer: Hopi Nublá i ku áwaseru lokal: Visibilidat: 18000 m. E “Parkour” ku a skohe pa e kompetensia tabata un meskla di olímpiko i “practical shooting” riba 25, 15, 10, i 5 meter meter di distansia uzando un kombinashon di pistol, kaliber 9mm i .22 largu.
Partisipantenan tabata Eric Soleana, Theursten Winklaar, Jadyr da Silva Piloto, Stephen Salas, Gandy Mauricio, Ethuriel Nicolaas, Mariela Valentijn, Gilroy Rynschot, nan tur representando Tirabon.
Pa e parti di skor, na di terser lugá a sali Jadyr da Silva Piloto ku un skor di 18 hits, tempu 1.03 minüt ku ta yega na hit factor di 0.29. siguí pa segundo lugá, señor Kevin Mens, ku un skor di 21 hits, tempu 1.05 minüt ku ta yega na hit factor di 0.32. E ganadó apsoluto a resultá di ta señor Theursten Winklaar ku un skor di 20 hits, tempu 56 sekònde ku ta yega na hit factor di 0.28.
Na final di e kompetensia, e presidente, señor Gandy Mauricio a hiba palabra felisitando Thuersten i gradisiendo tur e otro partisipante pa nan partisipashon. Tambe e presidente a gradisí Jadyr i Eric pa nan tremendo esfuerso ku a hasi e kompetensia bira un realidat.
Finalisando, e presidente a manda palabra di apresio i gradisimentu na nos spònsernan ku a sa di kere den Tirabon i asina hasi e kompetensia posibel; Voz di Bonaire, Jaryd da Silva Piloto, Ethuriel
Nicolaas, Kevin Mens, Di CHIRI services (Fabi), Rosandy Soliano-Ortega, Nikisha Abdul, Terresa (Terry) i Remsley Anthony ku a sòru pa e parti di kuminda.
Manera ta kustumber, despues di e torneo, a sigui pa e parti, kaminda ku presentenan a sosialisá un ku otro. Tabata un momentu tremendo kaminda ku deportistanan tiradó a pasa un ratu ameno ku otro.
