Detenshon
En konekshon ku un investigashon andando tokante un kaso di bringamentu ku a tuma lugá na Kaya Bototé na altura di Stadion Antonio Trenidad, riba djadumingu 22 di yüni, alrededor di 5 or di atardi, a detené un mucha hòmber di inisial J.J.P.J. di 15 aña di edat na warda di polis. E detenshon tabata pa violensia públiko, maltrato, maltrato ku arma i ladronisia ku violensia. Investigashon den e kaso ta kontinuá.
Kòntròl di tráfiko
Den oranan di mardugá di djadumingu 22 di yüni, entre 2.15 or i 3 or, a tene un kòntròl di tráfiko na altura di Rotònde Sùrnan di Roozendaal. A para i kontrolá un total di 20 vehíkulo.
A duna dos(2) but pa manehá sin reibeweis i pa manehá sin seguro. Ademas, a atendé ku vários shofùr tokante lusnan di nan vehíkulo ku por blèndu otro usuario, manera lusnan ‘dim’ i ‘spotlight’.
KPCN ta rekordá un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko. Di e forma aki bo tambe ta kontribuí na un tráfiko seif riba e isla.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
Detenshon pa ladronisia
Djasabra 21 di yüni, alrededor di 11.25 or di mainta, a detené un hòmber di inisial L.D.F. di 62 aña di edat na Plantashi Aruba pa ladronisia. E detenshon a tuma lugá despues ku a gara e sospechoso ta hòrta plachi di eternit for di un kunuku. A detené na e sitio i a hib’é warda di polis pa mas investigashon.
Ladronisia di plachi di number
Djasabra 21 di yüni a drenta keho di ladronisia di un plachi di number pegá patras di un vehíkulo. E outo tabata stashoná na Kaya Benz. Deskonosínan a lòs e plachi di number B-6752 i a bai kuné. Ta investigando e kaso.
Detenshon pa manehá bou di influensia di alkohòl
Den oranan di mardugá di djasabra 21 di yüni, a detené un hòmber di inisial J.L.A.C. di 49 aña di edat pa manehá bou di influensia di alkohòl. E sospechoso tabata enbolbí den un aksidente na Hanchi Amboina. A hasi un tèst di supla kuné for di kua a resultá ku e ta bou di influensia di alkohòl. A detené i hib’é warda di polis pa un análisis di rosea. A konsekuensia di e resultado di esaki a konfiská su reibeweis.
Detenshon pa destrukshon
Djabièrnè 20 di yüni, alrededor di 11 or di anochi, a detené un hòmber di inisial S.J.J.C. di 32 aña di edat na Hanchi Amboina pa destrukshon. E sospechoso a kometé destrukshon na un establesimentu di hóreka riba e kaya menshoná. Ta investigando e kaso.
Listramentu preventivo
Den oranan di anochi di djabièrnè 20 di yüni a tene kòntròlnan na vários establesimentu di hóreka den kuadro di listramentu preventivo. A kontrolá tantu persona komo vehíkulo.
Durante e kòntròl aki a konfiská un kantidat chikitu di supstansianan probablemente nárkotiko, un kuchú i dos skèr.
KPCN ta rekordá públiko ku polis ta disponé aktualmente di un òrdu formal pa listramentu preventivo den e áreanan di riesgo di seguridat designá. Esaki ta nifiká ku por listra kualke persona ku ta den e áreanan aki sin ku mester tin indikashon i/òf sospecho konkreto.
Nos ta konta ku boso koperashon. Esun ku nenga di koperá ku listramentu preventivo ta kore riesgo di detenshon. Listramentu preventivo ta keda un instrumento den e lucha kontra poseshon di arma i otro echonan kastigabel.
Kiebro den kas
Djabièrnè 20 di yüni a drenta keho di kiebro den un kas na Kaya Nikiboko Sùit. Deskonosínan a haña akseso na e kas via un bentana i a bai ku un mashin di bora. Ta investigando e kaso.
Ladronisia na bich
Djaweps 19 di yüni a drenta keho di ladronisia na Playa Pal’i Mangel (Donkey’s Beach) situá na E.E.G. Bulevar. Entre 2.45 or i 3 or di atardi, deskonosínan a bai ku dos(2) tas mientras ku e doñonan tabata snòrkel. Ta trata di un tas di bich koló blanku di e marka ‘Victoria Secret’ ku kontenido i un tas di lomba koló bèrdè di e marka ‘Patagonia’ ku kontenido. Ta investigando e kaso.
Bo a mira algu sospechoso? Yama 717 8000 òf e liña di tep anónimo 9310.
