Featured Bonaire Internacional

Oumento di kantidat di bishitante na Boneiru den e di tres kuartal


Oumento di kantidat di bishitante na Boneiru den e di tres kuartal
E kantidat di bishitante ku a bini Hulanda Karibense ku avion den e di tres kuartal di 2021 kasi a bira tripel kompará ku e mésun temporada un aña anterior. Kompará ku 2019 e kantidat di bishitante ku avion e último kuartal tabata 1 porshento mas haltu. E kantidat di moveshon di avion den e di tres kuartal kompará ku 2020 a subi ku sigur mitar. Espesialmente e kantidat di bishitante i moveshon di avion ku ta bai i bini Boneiru a oumentá e último kuartal. Esaki a sali for di e sifranan di mas resien di CBS ku ta keda anunsiá durante e presentashon di e publikashon ‘Trends in the Caribbean Netherlands, 2021’.
Den e di tres kuartal di 2021 un 38 mil bishitante a biaha ku avion pa Boneiru. Den total Boneiru a atraé mas ku dos bia i mei mas tantu bishitante ku un aña anterior. Kompará ku e mésun kuartal na 2019, den e di tres kuartal di e aña aki 9 porshento (3 mil) mas bishitante a bini Boneiru.

Espesialmente na yüli 2021 hopi bishitante a bini Boneiru. 14,7 mil bishitante a yega na e isla ku avion e luna ei. Durante e di tres kuartal di 2021 tabatin 3,2 mil moveshon di avion, 41 porshento mas ku e mésun temporada un aña anterior.

Parti di bishitante di Hulanda Oropeo a subi na Boneiru
Ku e reinisio i oumento di buelo for di Amsterdam e kantidat di bishitante for di Hulanda Oropeo ku a bini Boneiru a oumentá hopi, di mas o ménos 35 porshento na 2019 pa 55 porshento na 2021. E parti di bishitante ku nashonalidat merikano a baha, di 25 porshento na 2019 pa 14 porshento na 2021. Un splikashon pa esaki ta ku no tur kompania di aviashon ku promé ku corona tabata bula riba Boneiru a reanudá nan rutanan i orarionan kompletamente den e di tres kuartal.

E kantidat di bishitante ku a yega Saba ku avion den e di tres kuartal di 2021 kompará ku un aña anterior a oumentá te 1100. Esei ta sigur tres bia i mei mas tantu ku den e temporada komparabel di un aña anterior, pero te ainda mitar ménos ku den e mésun temporada na 2019 (2100 bishitante).
Den e di tres kuartal di 2021 Saba a prosesá sigur 900 moveshon di avion, sigur dos bia mas tantu ku un aña anterior i igual na e kantidat di buelo den e mésun temporada di 2019.

Kantidat di bishitante ku avion na Sint Eustatius ta 30 porshento di e nivel di 2019
Via F.D. Roosevelt Airport den e di tres kuartal di e aña aki 800 bishitante a bini Sint Eustatius, 60 porshento mas ku den e mésun temporada un aña anterior, pero 30 porshento di e kantidat ku den e mésun temporada na 2019 a bishitá e isla. Esaki probablemente ta pasobra gobièrnu a tene e fronteranan será hopi tempu i pasobra tin un maneho di entrada masha restriktivo.

Den e lunanan yüli, ougùstùs i sèptèmber 2021 tabatin mas moveshon di avion ku un aña anterior; sigur un bia i mei mas (1100) ku den e mésun temporada na 2020, pero ainda ménos ku e 1,6 mil buelonan na 2019.

Trends in the Caribbean Netherlands 2021
Pareu ku e notisia aki tambe ta publiká e edishon nobo di Trends in the Caribbean Netherlands 2021. Den Trends in the Caribbean Netherlands tin e sifranan mas importante den e área ekonómiko i sosial tokante e komunidat hulandes karibense.

E edishon aki ta spesial pasobra ta duna atenshon na e pandemia di corona na Hulanda Karibense, kiko tabata e desaroyo for di mart 2020 te ku sèptèmber 2021 i kon esaki posiblemente tabatin influensha riba e datonan ku a kolektá. Banda di esaki ta duna un kompilashon di sifra entre 2018 i 2020. Por haña e publikashon online komo longread i por download e komo pdf.

Splikashon:

Bishitante
E personanan ku pa motibu turístiko ta bishitá Hulanda Karibense yama ‘bishitante’ si nan no ta registrá den e Registro Sivil di Hulanda Karibense. Por kategorisá bishitante den bishitante di dia (nan no ta pasa un anochi na e isla) i turista (nan ta pasa minimalmente un anochi na e isla). Ta konsiderá bishitante di e islanan Boneiru, Saba i Sint Eustatius komo bishitante interno i no ta konta nan serka e turismo ku ta drenta.

Parti di bishitante
Porsentahe di bishitante segun nashonalidat (komo proxy pa e pais di prosedensia) ku ta bishitá Boneiru, Sint Eustatius i Saba ku avion (turismo ku ta drenta). E partinan aki ta kalkulá a base di sifra di e kuartalnan optenibel di e kuartalnan optenibel di e aña.

Related posts

Taste of Bonaire, Edishon Cocktail na Hulanda

EA News Author

937 persona den bijstand a ricibi ayudo financiero extra pa aña escolar 2021/2022

EA News Author

Minister Arends ta duna reconocemento na Sra. Maria F. Jose-Pimentel

EA News Author

Leave a Comment