Aruba ya a contesta e pregunta crucial pa e añanan cu ta bin nos dilanti:
Nos economia ta carece di un base solido pa sostene nos futuro, debi cu nos a bira demasiado dependiente di un solo industria. Durante hopi aña, a presenta turismo como e motor principal di Aruba. Indudablemente, e industria aki tin un rol enorme den nos desaroyo economico y miles di famia ta depende di dje, ya sea directamente of indirectamente. Sinembargo, nos mester reconoce cu un pais cu ta depende unicamente di un solo pilar economico, ta un pais sumamente vulnerable. Segun Tevreden, e crisis di COVID-19 a duna nos un bista cla riba e realidad aki. Den cuestion di apenas siman, Aruba su economia practicamente a para. Gobierno a wordo obliga na busca prestamo, companianan a cera nan porta, trahadonan a perde nan empleo, y hopi famia a drenta den un incertidumbre financiero profundo. E crisis ey no a crea nos dependencia; e simplemente a expone con fragil nos modelo economico realmente tabata. Y ainda asina, cu un gobierno nobo, nos no ta tende suficiente discusion serio tocante diversificacion economico.
Minister di Economia ta papia di agricultura, pero nada riba un escala cu lo impacta nos GDP grandemente. Turismo ta crucial. Pero turismo so NO ta suficiente pa carga un pais moderno cu:
Un debt to GDP halto
Un costo di bida creciente
Un infrastructura cu mester di mantencion urgente
Necesidadnan social cada bes mas grandi
Y un generacion nobo cu ta busca oportunidadnan mas amplio
Hopi pais chikito rond mundo a compronde un cos importante: un economia saludabel mester tin mas cu un pia pa para riba dje.
NOS TA NA SOÑO DEN LUZ BERDE
Aruba tin un posicion geografico unico den Caribe. Nos ta literalmente na porta di Sur America y cerca di un di e reservanan di energia mas grandi di mundo, Venezuela. Y mientras mundo ta move geopoliticamente y economicamente, Aruba mester stop di pensa chikito tocante su rol den region. E discusion no mester ta limita solamente na “turismo versus petroleo”, pasobra esey ta un dilema falso. E pregunta crucial ta: Con Aruba por crea mas actividad economico, tuma un posicion mas strategico y tin mas resiliencia financiero?
Mundo ta cambiando rapidamente. Particularmente despues di 3 di januari, nos ta mira con energia, logistica, comercio y infrastructura strategico ta birando cada dia mas importante. E paisnan cu sa di posiciona nan mes inteligentemente durante e periodonan aki di transicion, lo ta e paisnan cu ta bay sali mas fuerte economicamente. Un ehempel di esaki ta Barbados, cu si ta tumando accionnan concreto. Mientras otro paisnan ta pensa sstrategicamente riba e reapertura economico di Venezuela y e movicionnan den e mercado di energia, Aruba no por permiti su mes keda pega den e pensamento di un solo industria. Nos mester pensa mas grandi.
Diversificacion economico no ta un slogan; e ta un asunto di sobrevivencia nacional. Pasobra un pais cu ta depende di un solo motor economico eventualmente ta perde flexibilidad, poder di negociacion y stabilidad. Aruba simplemente no por keda vulnerabel cada bes cu turismo mundial enfrenta un crisis.
Conclusion
E futuro di Aruba indudablemente mester inclui turismo, pero tambe tecnologia, logistica, industria moderno, energia renobabel y e desaroyo structural di nos wafnan (port development). Claro cu e idea no ta pa bolbe bek den pasado manera den tempo di Lago, sino hustamente pa crea mas posibilidad pa nos futuro. E pregunta pa Aruba no ta si turismo ta importante. Claro cu e ta. E pregunta ta: Ki otro pilar economico serio, rendabel y a corto plaso Aruba ta enfocando riba dje awor, pa proteha su futuro den e proximo 20 añanan? Segun Tevreden, niun no ta mas grandi cu loke ta pasando actualmente rond di nos.
Pesey, den Parlamento nos a entrega un mocion pa Gobierno di Aruba sondea e posibilidadnan cu tin den nos region y actua efectivamente pa forma aliansanan strategico den e momentum aki. Lamentablemente, te cu awe nos no a mira ni un solo paso concreto. Al contrario, e falta di vision actual ta lanta e temor cu nos lo keda simplemente para wak, mientras e barco di progreso ta pasa nos bay.