Den ora nan di djamars mainta, 21 di òktober, Sentro Operashonal Marítimo di Wardakosta (MOC) a risibí un yamada for di un boto komersial na Klein Kòrsou pidiendo asistensia médiko.
Ta trata di un turista hende hòmber amerikano di 80 aña di edat na bordo di e boto komersial, kual tabata den nesesidat di asistensia médiko. E persona a haña dolor na su pechu i tambe e la haña su mes ku problema pa hala rosea. Personal di MOC a kontaktá e dòkter di CITRO ku a konstatá ku e persona mester risibí tratamentu médiko na Curaçao Medical Center (CMC).
Inmediatamente a alerta personal di e helikòpter di Wardakosta pa sali den direkshon di Klein Kòrsou pa asina por hiba e pashènt Hato (Kòrsou). Personal di ambulans tabata presente pa transportá e persona pa asina e risibí tratamentu médiko na CMC. Wardakosta ta desea e persona un pronto rekuperashon.