Aruba mester guia su desaroyo turistico cu un vision cla, cu ta pone bienestar di comunidad local, proteccion di naturaleza y calidad di bida na prome luga. Esaki ta e mensahe di parlamentario Jennifer Arends-Reyes, Presidente di Comision di Turismo di Parlamento, despues di su participacion na e encuentro special “How to Fix Tourism”, organisa pa AHATA.
E sesion a conta cu participacion di experto internacional Doug Lansky y Minister di Turismo, Transporte y Labor, Wendrick Cicilia. Durante e encuentro a trata diferente reto relaciona cu futuro di turismo, entre otro e presion riba infrastructura, trafico, naturaleza, facilidadnan publico, mercado laboral y calidad di bida di comunidad local.
Segun Arends-Reyes, turismo ta y lo sigui ta un di e pilarnan principal di economia di Aruba. Sinembargo, no por midi e exito di e industria solamente den cantidad di bishitante.
“Nos mester pasa di e pregunta ‘cuanto turista por yega?’ pa ‘con nos por crea mas balor pa Aruba y su pueblo?’. E meta no mester ta solamente mas turismo, sino un turismo mihor y mas sostenibel,” Arends-Reyes a declara.
Un di e puntonan central di e presentacion tabata e necesidad pa respeta e capacidad real di nos isla. Aruba tin teritorio y recursonan limita, mientras cu su infrastructura mester sostene tanto comunidad local como industria turistico. P’esey, decisionnan tocante crecemento mester ta basa riba informacion, planificacion y un vision pa largo plazo.
E parlamentario ta sostene un enfoke den cual crecemento den balor ta mas importante cu crecemento den volumen. Esaki ta implica promove un turismo cu ta stimula estadia mas largo, gasto den economia local, respet pa naturaleza y aprecio pa cultura y identidad di Aruba. Na mes momento, mas empresario y trahado local mester por beneficia directamente di desaroyo turistico.
“Turismo mester traduci den mihor oportunidadnan di trabou, salario digno, mas espacio pa empresario local y inversion den nos districtonan. Si economia ta crece, ciudadano tambe mester sinti e progreso den su calidad di bida,” Arends-Reyes a enfatisa.
Pa logra esaki, segun e parlamentario, ta necesario pa gobierno, parlamento, AHATA, sector priva y comunidad sigui dialoga tocante un strategia nacional. E strategia aki mester inclui maneho di trafico, proteccion di naturaleza, desaroyo di recurso humano, disponibilidad di vivienda y un balans entre hotelnan, short term rentals y e necesidadnan di nos propio pueblo.
Arends-Reyes a gradici AHATA pa organisa e encuentro y crea espacio pa un intercambio franco tocante futuro di e industria. El a subraya cu Aruba no por laga turismo crece sin direccion, sino cu e isla mester guia su desaroyo conscientemente, proteha loke ta hacie unico y pone bienestar di su pueblo na curazon di cada decision.
“Turismo ta di Aruba, pero Aruba no ta solamente turismo. Nos responsabilidad ta pa cuida ambos, pa e generacion di awe y esnan cu ta bin,” Arends-Reyes a conclui.
