Mirando cu desde algun tempo inflacion y costo di bida a subi drasticamente pa via di e aumento di flete, aumento di petroleo, gasoline, diesel, scarcedad di productonan riba mercado global y e guera na Ukraina cu tur dia ta escalando, mi ta urgi pa gobierno pa subi e minimum loon aki na Aruba. Nos pueblo ta pasando den momentonan dificil y duro financieramente. Nos pais ta den un crisis economico grandi causa pa un megadebe y e lo bay tuma tempo pa nos por recupera y libera capital financiero pa por inverti den nos pais, tanten cu e megadebe nacional aki ta mas grandi cu nos economia.
Aunke nos economia a constata un crecimiento record den turismo desde April 2022, nos pilar economico principal, y Banco Central di Aruba a saca un rapport cu den e prome kwartaal di aña nos pais tabata tin un crecemento economico di 16.2%, esaki no ta traduci inmediatamente den un mehoracion financiero pa tur nos ciudadanonan. Claro cu e recuperacion y crecemento economico a crea miles di cuponan di trabao y hopi famianan por lanta bek atrobe, sinembargo mester subraya cu inflacion y costo di bida a subi y ta afectando specialmente esnan cu tin un salario minimo. E biyete di 100 florin ya no ta cumpra e mesun cantidad di comestibles mas.
Ta pa e motibonan aki mi ta urgi gobierno pa responde na e situacion actual cu determinacion y aumenta e minimum loon pa e homber chikito cu tin mester di esaki. Tin mas o menos 36 mil hende cu ta cay bao di un entrada di 2500 florin of menos, cu ta aproximadamente 34% di nos poblacion. Esaki sigur lo trece alivio, banda di e beneficionan positivo cu gobierno ta bai introduci entrante 1-1-2023 atraves di servicio di impuesto DIMP manera;
- Esnan cu ta gana 2500 florin of menos pa luna lo no paga belasting mas. Esaki ta representa 36.136 persona akin a Aruba entrante 1-1-2023;
- Tarifa di impuesto lo baha pa TUR hende cu 2% entrante 1-1-2023;
- Impuesto di ganashi di compania winstbelasting lo baha di 25% pa 22% entrante 1-1-2023.
For di akinan enadelante lo mi sigui trata e punto aki pa lucha na e bienestar di pueblo en general y lo usa e diferente recursonan di Parlamento na mi disposicion pa wak esaki bira un realidad pronto pa e pueblo di Aruba,
Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!