HulandaFeaturedInternacional

Parlamentario Shailiny Tromp-Lee: Bishita di trabou na TU Delft tabata imprecionante

Bishita Di Trabou Na Tu Delft Tabata Imprecionante

Diasabra 3 di juni 2023, e delegacion di IPKO a bay un bishita di trabou na e Green Village di TU Delft. E Green Village ta un campo di innovacion sostenibel den un setting urbano, esta unda hendenan ta biba. 

Na yegada e delegacion a keda ricibi pa e Vice-rector di Asuntonan Internacional Prof. E. Voute, y e director di e Green Village, Ir. M. Kreijns. E programa a inicia cu un presentacion di Prof. E. van Bueren, di e Facultad di Arkitectura. El a duna splicacion di un serie di investigacion y proyecto, incluyendo esunnan di studiantenan haciendo nan doctorado na TU Delft, cu nan contexto di proyecto tin di haber cu nos islanan. E proyectonan aki ta concentra riba planificacion sostenibel y desaroyo urbano. Ta trata di e.o., construccion di vivienda resistente na nos clima, efecto climatico, e procesamento di sushi, e transporte y generacion di energia sostenibel den un espacio limita. 

Siguiente presentacion tabata di prof. B. van Breukele. El a duna presentacion riba un serie di investigacion y proyecto en conexion cu e proyecto Sealink na Curaçao. Ta trata di temanan manera nos awa, en particular e efectonan di e contaminacion di awa riba tera y e calidad di awa di lama y e coralnan. E estudionan tin como obhetivo pa obtene informacion di e  diferente fluho di awa direccion di lama y e composicion di e fluhonan aki. 

Finalmente, Sr. F. Lippmann, Gerente di Innovacion di Energia Renobabel y Marino, a haci un presentacion riba varios proyectonan na y di TU Delft destina pa genera energia sostenibel den lama, incluyendo diferente tipo di energia. Gran parti di e investigacionnan ta interdisciplinaria, cu participacion di diferente facultadnan di TU Delft.  Tambe ta trata di colaboracionnan cu sector priva y empresarial. Despues di tur e presentacionnan nos a haya un recorido  den e Green Village. Sigur un tremendo diasabra yena di ideanan innovativo y sostenibel. 

Related posts

AHATA: “Plan di impuesto 2023” ta un fundraiser di gobierno

EA News Author

Lider di partido AVP Mike Eman : Gobernador por scoge pa forma dos informador

EA News Author

AHATA: Ocupacion di hotel ta recuperando

EA News Author

1 comment

Leave a Comment

Whatsapp Message