Keto bay no tin transparencia den caso di Minister Gerlien Croes y e jet priva.
Despues di un periodo di recuperacion, parlamentario Shailiny Tromp-Lee a bolbe bek na pia di trabou. Pero pa algun topico, ta mane tempo a keda para, p’esey e ta bolbe trece dilanti e tema di e biahe di Minister Gerlien Croes cu jet priva.
Minister a bisa nos: “Mi mes a paga”. Pero te dia di awe, nos no tin niun prueba:
• Nos no sa cuanto el a paga.
• Nos no sa ki dia el a paga.
• Nos no sa na ken el a paga.
Y loke ta mas grave: Tin un conseho di LAR cu ya ta riba mesa pa mas cu un luna caba riba e asunto aki. No obstante cu Parlamento a pidi e documento aki, te ainda no a ricibi’e. E Minister tabatin 6 siman pa actua y informa corectamente. 6 siman a pasa, y nada. Esaki no ta descuido, sino un nengacion delibera di informacion na pueblo.
Pakico esaki ta importante?
Pasobra ora bo ta Minister, bo no ta solamente maneha placa di pueblo, bo ta maneha confiansa di pueblo. Y bo mester cumpli cu reglanan di conducta y bon gobernacion. Esakinan no ta un opcion, pero un obligacion.
LAR (Ley di Administracion di Pais Aruba) ta e “regla di cas” di gobierno. Den LAR y den e principionan di bon gobernacion ta para cla:
*Transparencia – Informa na tempo. No warda simannan largo.
*Integridad – Mustra prueba ora bo ta uza beneficionan grandi manera un jet priva. No *solamente bisa “mi a paga”.
*Responsabilisacion – Ora Parlamento pidi documento, e Minister mester entrega. Ta *parlamento ta controla gobierno, no parobes.
Ora bo tin simannan pa duna splicacion y bo ta scoge pa keda keto, bo ta manda un mensahe robes na pueblo: “Mi ta haci loke mi kier y mi no mester duna cuenta.”
Nos exigencia ta cla y urgente:
*Minister mester entrega e uitspraak di LAR na Parlamento awe mes. No mas excusa.
*Presenta prueba completo: Factura, suma, fecha, y na ken a paga pa e uzo di e jet priva.
*Splica pueblo pakico a tarda lunanan pa brinda claridad, y dicon no a cumpli den e 6 simannan despues di e uitspraak di LAR.
*Minister mester cumpli cu ley. Pasobra bon gobernacion no ta opcional; ta un obligacion.
Nos famianan ta conta cada florin pa paga luz, awa y cuminda. E minimo cu nos por pidi di un gobernante ta e mesun cos: cumpli cu ley, entrega documento, y duna respet na Parlamento.
E ta suppose di ta asina simpel, pero aparentemente ta masha dificil pa Minister Gerlien Croes cumpli y sera e capitulo aki. E pregunta cu pueblo mester haci ta un so: Pakico ta asina dificil pa e minister contesta cu e berdad?