Minister Wever ta propone cuatro cambio grandi den LNT. E pregunta principal ta: ken lo controla e salarionan despues, segun cua norma y con Parlamento y pueblo lo por verifica esaki?
1. Saca companianan gubernamental for di LNT
Minister ta bisa cu e companianan aki ta opera comercialmente y cu Gobierno, como accionista, por controla remuneracion di nan topfuncionarionan.
Pero si nan sali for di LNT, e limite stipula den ley lo desaparece. Control lo pasa pa decisionnan cu Gobierno ta tuma como accionista. Esaki por significa cu cada Gobierno lo aplica su propio criterio. Ademas, no tur compania gubernamental ta opera den competencia liber, algun tin un posicion exclusivo of ta brinda servicio publico.
Minister mester presenta:
* Un lista di tur compania cu lo sali.
* Cua ta opera realmente den competencia.
* Nan remuneracion actual compara cu e limite di LNT.
* E sistema cu lo reemplaza e control legal.
* Con Parlamento y pueblo lo por controla e decisionnan salarial.
2. Saca diferente entidad publico for di LNT
Minister ta propone pa elimina articulo 2, prome lid, sub c, ten 2°. Como consecuencia, APFA, FCCA, Fondo Nacional pa Vivienda, Hospital y Laboratorio Medico lo sali for di LNT.
Esaki ta trata di entidadnan cu ta administra pensioen, vivienda social, cuido medico y otro interes publico. Si nan sali for di LNT, nan topfuncionarionan lo no ta liga mas na e limite salarial riba fundamento di e disposicion aki.
Gobierno mester splica:
* Si solamente e cinco entidadnan aki lo sali of tin mas.
* E motibo individual pa saca cada entidad.
* Cua fondo publico cada entidad ta ricibi of administra.
* E consecuencia financiero.
* Cua garantia lo evita aumento salarial sin limite y sin control publico.
E pregunta ta: si un entidad ta administra placa of servicio publico, ta responsabel pa kita e norma salarial sin indica cua control lo reemplaza esaki?
3. Kita e bijlage for di e ley formal
Actualmente e bijlage di LNT ta forma parti di e ley y por cambia solamente cu aprobacion di Parlamento. Minister kier move e lista pa un nivel legislativo mas abou.
E cambio por haci e sistema mas flexibel, pero tambe por reduci control democratico. Gobierno lo por agrega of elimina entidadnan mas facilmente, sin un debate completo y posiblemente sin aprobacion previo di Parlamento.
Minister mester splica:
* Na cua nivel legislativo e lista lo wordo regla.
* Ken lo por cambia e lista.
* Cua criterio lo determina si un entidad ta drenta of sali.
* Cua rol Parlamento lo conserva.
* Con Gobierno lo evita decisionnan politico of sin suficiente motivacion.
Mas flexibel no por significa menos transparente of menos control.
4. Reemplaza e maximumbedrag general
Actualmente LNT tin un limite general di Afl. 369.000. Minister kier reemplaza esaki cu diferente limite adapta na funcion, sector y realidad regional.
Un sistema diferencia por tene cuenta cu responsabilidad y escasez di profesionalnan. Pero sin criterio cla, e por trece desigualdad, excepcionnan amplio y aumento salarial. Si casi cada funcion haya su propio norma, LNT por perde su funcion como limite efectivo.
Parlamento mester haya sa:
* E sumanan y categorianan concreto.
* E paisnan y institucionnan cu lo wordo uza pa compara.
* E metodologia pa calcula cada limite.
* E cantidad di topfuncionario cu lo haya un limite mas halto.
* E costo adicional pa sector publico.
* E motibo pakico articulo 12, cu ya ta permiti excepcion, no ta suficiente.
Kico lo keda di LNT?
Gobierno kier saca companianan y entidadnan for di LNT, move e lista pa un nivel legislativo mas abou y reemplaza e limite general cu diferente norma.
Sinembargo, Gobierno ainda no a presenta e sistema cu lo reemplaza e controlnan existente. Sin claridad riba ken ta keda bou di LNT, cua limite ta conta, ken por cambia e reglanan y con Parlamento por controla, Parlamento no por duna un opinion responsabel.
