Pasobra ta fabor di hende mi ta busca of di Dios,of ta hende mi ta trata di agrada. Si ainda ta hende mi ta trata di agrada , lo mi no tabata un sirbido di Dios.( Galationan 1:10).
Ora bo tin sigur cu bo haci ta bon den bista di Dios, no worry cu opinion di hende pasobra hende semper lo critica bo, ora bo sa cu bo ta den boluntad di Dios, cumpliendo cu Dios su proposito pa bo bida, bo por laga tur biento cu kier supla , laga nan supla bay pasobra hasta di Hesus hende a papia malo.
Si e muher cu tabatin diesdos anja cu e problema di fluho di sanger, tabata busca opinion di hende enbes di mishi cu e panja di Hesus lo e no a wordo salba y sana, pasobra ora bo tin fe den Dios, bo mester move pasobra fe sin obra ta morto.
Ora bo sa cu Dios ta cu bo bay pa locual cu bo tin cu haci, pasobra hopi lo critica y busca manera di stroba cos , pero Dios den su inmenso amor ta sostene tur esnan cu ta kere den dj’E.
Si Bartimeo a keda keto y busca opinion di hende lo e no a hanja su bista, asina mes nan no tabata kier pa e grita Hesus.
Laga nos busca e cosnan cu ta trece pas y edificacion di otro.
Temor pa hende ta pone un trampa,ma esun cu confia den Senjor lo ta halsa.(Proverbionan 29:25).
Ansha den curason di hende ta hacie abati, pero un bon palabra ta hacie contento.( Proverbionan 12:25).
Tira bo carga riba Senjor y e lo sostene bo, nunca e lo no permiti pa e husto wordo movi.( Salmo 55:22).
Confia den Senjor cu henter bo curason, y no depende riba bo mes comprendemento. ( Proverbionan 3:5).
Aprobacion di Dios, nos ta hanja ora nos busca Dios di henter nos curason den oracion, pasobra nos mester pidi Dios pa su boluntad ta activo den nos bida, boluntad di Dios nos ta algo cu nos ta haci ora nos kier, pero ta algo cu mester ta biba constantemente den nos.;
Si bo kier haci bon spera critica ,rechaso y traicion di hende, pasobra e palabra di Dios ta bisa cla den 2 Timoteo 3:3 cu tin hende cu ta odia locual ta bon. Tin hende cu kier biba constantemente den guera nan ta ireconciliabel, nan no kier haci bon, nan no kier respeta opinion di otro hende y nan no kier mira nan prohimo bay dilanti.
Y ta esey ta cosnan cu nos tin cu sinja nos yuinan, especialmente nos hubentud, cu no ta tur cos bo tin cu para discuti , tin hende cu bo tin cu gewoon cana bay laga nan, pasobra abo tin bista riba un bon futuro, pero otronan ta busca mal fama, riba bo cuenta.
Laga nos para un rato keto y wak bon, ken ta dirigi nos bida, e mundo of Dios, placa of poder di Dios, pasobra esun cu ta domina bo ta dirigi bo bida. Y bo tin cu tene cuenta cu esey.
Ora Nehemias kier a haci bon y lanta e murayanan di Jerusalem , tres enemigo a presenta riba dje, pa asina strobe di cumpli cu e vision cu Dios a dune, Nan tabata Tobias amonita, Shambalat horonita, y Gesem e arabir. ( Nehemias 2;17-20). Nan tabatin mal spirito y nan a haci bofon di dje, pero ora nan a ripara cu e ta serio nan a opone e plan seriamente.
Pesey nos mester busca aprobacion di Dios.