Featured Bonaire

Presentashon Parke publiko Sunset Beach


Hotel Bonaire, Sunset Beach Resort i pa esnan mas hoben Coco Beach. Pasando banda di e tereno aki ta trese nostalgia serka mi komo un yu di tera i mi ta kere ku esaki ta e kaso serka kada unu di boso komo Boneriano i habitante di nos dushi isla di Boneiru.

Ku hopi orguyo i tambe entusiasmo mi ta pará aki pa presentá na boso e bunita proyekto aki. Algu ku tantu e pueblo di Bonieru a anhelá pe. Algu ku nos komo habitante di Boneiru meresé. Un proyekto ku nos por ta hopi orguyoso di dje. Mi a kompronde ku e proyekto aki por te hasta konsiderá uniko den e area aki.

E inisio di e proyekto aki ta data mas o menos 10 aña pasá na 2012. Ora ku Bonaire Overheidsgebouwen N.V. (BOG) ku aprobashon di gobièrnu a tuma e desishon pa bende e tereno aki gobiernu di Boneiru a proponé pa repartì e tereno aki den 4 pida. E hotel Chogogo ta ubiká riba 2 pida parsela. Mas na suit ta e parsela ku Bonaire Sunset Beach Resort ta bai desaroyá. Kaminda nos ta pará aki te na e rotòndu ta e parti ku gobiernu a proponé pa keda desaroyá komo un area publikó.

E proposishon aki no ta sin mas. E intenshon ta i tabata semper pa e playa dilanti di e resortnan keda liber i aksesibel pa e pueblo di Boneiru. I ku e proyekto aki lo krea e aksesibilidat pa un i tur na e playa aki. Mi ta pone aksento na e un i tur. Ora mi sigui splika mas di proyekto boso lo kompronde kiko mi kier bisa ku esaki.

Mi antesesor den e funkshon aki, señor John Soleano ku tbt na inisio di e plan no por ta presente pa motibu di kebrante di salú. E konsehero i e ‘brain’ tras di e kreashon aki lamentablemente no por ta presente awe pa motibunan di trabou den exterior, señor Farley Virginia di Heren2. E la manda si su representantenan ku ta presente awe. E personanan aki semper a kere den e proyekto aki. Mi ta rekonose presensia di representantenan di gobièrnu di Boneiru ku tambe semper a kere den e proyekto aki i a para nos tras pa realisá e proyekto aki.

Mi lo bai konta boso mas di e proyekto aki. Despues di a traha e promé pinturanan di e proyekto, nos a invitá tur e organisashonnan riba area di naturalesa pa sinta huntu ku nos na mesa pa elaborá riba e plan. Pasombra traha konstrukshon kantu di laman tin su retonan. Ta hopi kos bo tin ku tene kuenta ku ne. Nos a reuni na diferente okashon ku STINAPA, Reef Renewal Bonaire, Sea Turtle Conservation, ECO Bonaire, Piskabon i tambe Wereld Natuurfonds. Ku tambe mi ta rekonose nan presensia awe. Un danki di kurason pa boso apoyo enespesial Judith Raming ku ta e Marinepark Manager di STINAPA i tambe un hurista ku a guía i kana ku nos den tur e artikulonan di lei ku nos tin ku tene kuenta ku ne. Na tur nos mester a entrega mas di 10 diferente petishon di pèrmit pa por realisá e proyekto aki.

Aki nos ta ilustrá na boso e blue print di e proyekto ku mi lo bai amplia mas riba dje.

E parke di rekreo ku lo wòrdu konstruí na Sunset Beach lo ta un parke speshal pa e pueblo di Boneiru. Den e parke aki, ku lo ta aksesibel pa un i tur, lo bini diferente elemento ku lo yuda kontribuí no na solamente rekreashon pa grandi i chikí, pero tambe ku lo mester inspirá tur ku bishitá e parke pa ta mas aktivo fisikamente.

Asina lo bini ku un fasilidat di ‘fitness’ kaminda lo tin diferente aparato ku por wòrdu husá pa train.

Tambe lo bini un area kaminda muchanan chikí por hunga. Pa e área pa mucha a eloborá ku Jantje Beton ku a hasi un investigashon bou di nos muchanan na Boneiru pa por haña sa kiko ta deseo di nos hobennan pa loke ta trata parke di rekreashon. E muchanan a indiká ku nan kier algu di awa. Nos a duna oido na deseo di nos muchanan i nos a inkorporá un elemento di awa den e área aki.

Mas den e parke lo bini un fasilidat di BBQ. Ademas e parke lo tin diferente fasilidat manera un tualèt, palapa, kioskonan ku lo bende produkto manera kos di bebe, un restorant lokal i un ‘sleephelling’ pa baha entre otro boto na laman.

Manera mi a menshoná anteriormente, nos a tene kuenta ku un i tur ku ta habitá e dushi isla aki. Pesei nos a sinta tambe ku MIVABO i e departamentu di Samenleving en Zorg. Nos a kòrda riba nos grandinan i persona ku inkapasidat fisiko. E persona nan aki por move trankilamente tur kaminda den e parke.  Ta bai bini un ‘helling’ pa hendenan ku tin un inkapasidat físiko pa baha den laman na un manera seif i un area di parkeo.

Den hinter e parke tambe lo bini un fasilidat di wifi i diferente tipo di palu i mata lokal manera ‘silver bottom’, Flamboyan i banana di ref, ku lo yuda tene e temperatura den e parke mas agradabel pa e bishitantenan. Ta interesante pa menshoná ku e idea ta pa irigá e palunan aki ku awa resiklá di kloaka. Tambe lusnan i kamaránan supermoderno i ‘smart’ lo wòrdu husá ku por wòrdu kontrolá riba distansia pa asina por yuda manehá e gastunan di mantenshon mas mihó i tambe yuda ku e parti di seguridat. Nos kompanianan di utilidat WEB i TELBO tambe a duna nan apoyo pa e parti di infrastruktura aki durante desaroyo di e plannan.

Materialnan ku lo husa ta duradero i ‘hufterproef’; asina lo husa entre otro ‘breukstenen’ i palu pa algun elemento. E materialnan ta di kalidat haltu anto por bon kontra di e klima agresivo ku nan lo ta aden. E area di parkeo lo no hanja asfalt pero un superfisie ku ta habrí kaminda awaseru entre otro por pasa dor di dje. Den e diseño a tene kuenta tambe ku e naturalesa ku e area ta wòrdu rondoná dor di dje.

Tambe nos a tene kuenta ku loke nos leinan ta preskribí pa por huza santu den e area aki. Nos a kumpli ku sertifikashon di e santu ku nos ta bai hasi uso di dje dor di un kompania rekonose ku a otorgá nos e lisensia.

E kontratista prisipal pa ku e proyekto aki ta Bonairiaanse Wegenbouw Maatschappij (BWM) ku lo bai kontratá i traha ku diferente kontratistanan i kompanianan lokal pa traha riba e diferente partinan ku e parke ta konsistí di dje i tambe pa kordiná e trabounan.

E intenshon ta pa e parke aki ta kla i funkshonal aki 10 luna si no tin niun kontratiempu manera risibi materialnan ku tin ku bini for di afó.

Ku realisashon di e proyekto aki Bonaire Overheidsgebouwen kier demostrá ku e kompania aki tin potensial i tambe derechi di eksistensia. I ku esaki por habri kaminda pa Gobiernu di Boneiru duna nos e konfiansia pa realisá proyektonan di parselashon (verkavelingsplan) i e tambe un edifisio sentral di gobiernu (centraal overheidsgebouw). Petishon di proyektonan ku nos a saka man mas di un aña pasá na gobièrnu pa yuda realisá esakinan.

Related posts

Grupo “Ta Basta” End Child Abuse cu un manifestacion di auto dilanti Parlamento di Aruba.

EA News Author

A stipula presupuesto pa inversion den ekipo di Guarda Costa Caribe cu e plan di termino Largo 2019-2028

EA News Author

Prijsnan maximo di productonan

EA News Author

Leave a Comment