Bou di guia di Clint Gosepa
Gang di Arte ta anunsia un oportunidat úniko di baile pa hoben entre 12 pa19 aña. For di 8 di sèptèmber te ku 3 di òktober, Gang di Arte lo organisa un kurso di baile folkloriko bou di guia di instruktor di baile Clint Gosepa.
E kurso lo tuma lugá di, djaluna pa djabièrne di 6or pa 8or di anochi i ta ofresé un kombinashon úniko di baile folkloriko tradishonal i tambe e fushon ku estilo kontemporaneo. E idea ta pa kulmina e kurso ku un presentashon pa publiko general dia 4 di òktober, kaminda partisipantenan lo por mustra e habilidadnan nobo ku nan a siña na famia, amigunan i komunidat.
Partisipantenan lo haña e oportunidad pa siña pasonan tradishonal ku a pasa di generashon pa generashon, sinti e forsa di ritmonan kultural i ekspresá nan mes den baile folkloriko outéntiko. E programa ta duna hoben e oportunidad pa konektá ku nan rais kultural dor di moveshon i partisipá den konta historia pa medio di baile.
“Nos ta kere den e forsa di baile pa konektá hoben ku nan herensia,” segun e organisadonan di Gang di Arte. “Clint Gosepa ta trese un rikesa grandi di konosimentu i eksperensia ku lo inspirá i enrikesé nos partisipantenan.”
Clint Gosepa ta un instruktor di baile ku hopi eksperensia, spesialisá den baile folkloriko. Su
eksperensia den kombiná folklore tradishonal ku contemporario ta hasi su estilo úniko pa e programa akí. E estilo lo por konekta grandi i chiki huntu.
Partisipashon ta kompletamente gratis. Pero ta spera ku partisipantenan lo trese dedikashon i energia positvo na e kurso. “Nos ke pa tur hoben tin e oportunidad pa biba e eksperensia kultural akí, sin mira situashon finansiero,” Asina Marlies Vels koordinado di e programa di Gang di Arte a informa. “Loke nos ta pidi ta disiplina, kompromiso i un aktitud habrí pa siña i krese.”
E kantidat di luganan den e programa akí ta limitá pa garantisá un eksperensia di siñansa ku kalidat. Hoben ku tin interés ta wordu stimulá pa registra lihe via: https://www.cognitoforms.com/ACEFoundation1/GangDiArteDANCE
Pa pregunta òf asistensia adishonal, bo por tuma kontakto ku ACE Foundation. Por jama na telefon +599 790-0155 of mail: acesbonaire@gmail.com
E organisashon ta spera ku prinsipalmente nos hobennan ta gara e oportunidat aki pa e biahe di baile kultural spesial akí. Un petishon ta bai na mayornan tambe pa empuha e yu pa bai e kurso aki ya asina ta soru pa tene e kultura Boneriano, Antiano bibu.
