Na un enkuentro regional na Montevideo, SER di Kòrsou a enfatisá e nesesidat pa asosiá enseñansa, polítika laboral i koheshon sosial
Den un region kaminda inteligensia artifisial (IA), migrashon i desigualdat ta tranformá mundu di trabou di un forma aselerá, Kòrsou ta pará dilanti di un pregunta di karakter urgente na nivel di maneho públiko, esta: kon pa garantisá ku hóbennan, muhénan i trahadónan no keda atras den e transformashon aki. E pregunta aki tabata sentral durante partisipashon di Konseho Sosial Ekonómiko (SER), na un enkuentro internashonal di konsehonan ekonómiko i sosial i institushonnan di diálogo sosial, ku a tuma lugá di 19 pa 21 di mei último na Centro de Formación de la Cooperación Española na Montevideo, Uruguay. SER a keda representá riba nivel tékniko pa drs. Sr. Raul Henriquez, direktor i sekretario general, i Sra. mr. Miloushka Sboui-Racamy, konsehero mayó enkargá ku asuntunan internashonal.
E enkuentro a trese institushonnan di diálogo sosial for di, entre otro, Spaña, Guatemala, Repúblika Dominikano, Honduras, Portugal, Brasil, Peru, Chile, Uruguay, Argentina, Costa Rica, Panama i Kòrsou huntu. E diskushonnan a enfoká riba gobernashon demokrátiko, migrashon, diskriminashon, desigualdat, akseso di e sekso femenino na oportunidatnan di desaroyo, enseñansa i e konsekuensianan sosial di inteligensia artifisial.
E apertura ofisial tabata na enkargo di Juan Castillo, minister di Trabou i Seguridat Sosial di Uruguay. Su presensia a subrayá un mensahe sentral dje enkuentro: diálogo sosial no ta solamente un mekanismo formal di konsulta, sino un instrumento pa hasi komunidatnan mas resistente den un periodo di kambio sosial, teknológiko i ekonómiko ku ta bai hopi aselerá.
Durante e reunion di CESISALC, e ret regional di konsehonan ekonómiko i sosial i institushonnan similar di Latino Amérika i Karibe, SER a duna kontribushon riba dos tema ku ta toka direktamente agènda di maneho públiko di Kòrsou: akseso di muhénan na oportunidatnan di desaroyo i futuro di enseñansa den era di inteligensia artifisial.
Segun SER, e temanan aki ta konvergí den un tarea sentral: fortalesé e konekshon entre enseñansa, fakultatnan, merkado laboral i mobilidat sosial. Igualdat di derechi ta nesesario, pero e no ta sufisiente. Oportunidatnan real pa hende muhé ta eksigí akseso efektivo na enseñansa, trabou, formashon, liderato i partisipashon den toma di desishon. Enseñansa, formashon profeshonal i kapasitashon durante henter bida no ta temanan sekundario; nan ta kondishonnan fundamental pa independensia ekonómiko i partisipashon signifikante den sosiedat.
SER a enfatisá tambe ku no mester trata inteligensia artifisial komo un desaroyo puramente teknológiko. Pa un ekonomia chikí, habrí i multilingual manera esun di Kòrsou, IA ta, promé ku tur kos, un kuestion di maneho públiko. E manera ku skolnan, dunadónan di trabou, trahadónan i Gobièrnu ta respondé na transformashon digital lo yuda determiná si teknologia ta habri mas oportunidat òf, al kontrario, ta profundisá hiatonan eksistente riba merkado laboral.
“Pa Kòrsou, e pregunta sentral no ta si inteligensia artifisial lo kambia merkado laboral, sino si nos maneho di enseñansa i merkado laboral lo adaptá sufisientemente lihé pa inkluí hóbennan, muhénan i trahadónan den e transishon aki,” Henriquez a deklará. “Diálogo sosial institushonalisá no ta un formalidat administrativo. E ta un hèrmènt nesesario pa hasi maneho públiko aplikabel, balansá i ampliamente sostené pa komunidat en general.”
E urgensia pa Kòrsou ta konkreto. Segun sifranan mas resien di Ofisina Sentral di Statistik (CBS) di Kòrsou, desempleo general a baha di 13,1% na 2022 te 7,8% na 2024. Desempleo hubenil a baha den e mesun periodo di 29,8% te 16,3%. E avanse aki ta importante, pero e nivel di desempleo bou di hóbennan ta keda un señal kla: mester fortalesé e konekshon entre enseñansa, formashon profeshonal i merkado laboral mas ainda.
P’esei, e debate na Montevideo tabatin un importansia direkto pa Kòrsou. Un pais ku ta aspirá kresementu inklusivo no por sigui trata enseñansa, abilidatnan digital, partisipashon di hende muhé, maneho migratorio i protekshon sosial komo temanan di maneho separá. Huntu, nan ta forma e base pa siguridat di entrada, produktividat i koheshon sosial.
Banda di enseñansa, igualdat di género i transformashon teknológiko, migrashon i desigualdat tabata temanan prominente riba agènda. Pa Kòrsou, e temanan aki tampoko no ta konseptual. Migrashon laboral, kambio demográfiko i koheshon sosial ta influensiá direktamente struktura di merkado laboral, preshon riba servisionan públiko i kalidat di toma di desishon. Ta p’esei SER ta konsiderá partisipashon aktivo den retnan regional unu esensial: e retnan aki ta permití paisnan i institushonnan interkambiá konosementu, eksperensia i práktikanan di maneho públiko.
Tambe SER a asistí dia 21 di mei na apertura di un reunion di RICESIS, e ret ibero-amerikano di konsehonan ekonómiko i sosial i institushonnan similar. Debí ku Kòrsou no ta un pais ibero-amerikano, a plantea partisipashon di SER den e ret aki komo opservadó. E posishon aki ta ofresé un ruta adishonal pa konektá Kòrsou ku otro retnan ibero-amerikano di diálogo sosial, konosementu di maneho públiko i koöperashon institushonal.
Segun SER, partisipashon internashonal no ta un meta riba su mes. Su balor ta sinta den tradukshon di perspektivanan regional den konsehonan mihó fundamentá i basá riba evidensia pa Kòrsou. E temanan tratá na Montevideo — migrashon, desigualdat, oportunidatnan pa hende muhé, enseñansa i inteligensia artifisial — ta mishi direktamente ku futuro di trabou, entrada i koheshon sosial riba e isla.
Ku su partisipashon, SER a reafirmá su kompromiso pa konektá Kòrsou ku retnan regional i mundial di konosementu riba tereno di diálogo sosial. Den un tempu kaminda retonan sosial i ekonómiko ta traspasá fronteranan nashonal kada bes más, e konekshon aki ta esensial pa enrikesé formashon di maneho públiko na Kòrsou ku análisis komparativo, eksperensia práktiko i solushonnan ku tin sosten amplio den komunidat.
