Representantenan di e organisacion About Our Father Business (AOFB) a expresa nan gratitud pa e colaboracion cu nan a haci cu Stichting HUNTO pa fortalece e esfuerso pa yuda adictonan ambulante na Aruba.
Paul Marchena, co-fundador di AOFB, a indica cu el ta hopi agradecido na Dios pa e oportunidad di traha riba un proyecto asina bunita y significativo pa e comunidad. Segun Marchena, e momento di mira diferente organisacion di rond mundo bin hunto pa sostene e causa aki ta algo hopi special.
El a señala cu e trabou cu Stichting HUNTO ta realisando na Aruba ta inspira hopi hende y organisacionnan pa contribui den e lucha pa brinda mas apoyo y cuido na esunnan cu ta confronta problema di adiccion.
Demar Lutz, presidente y fundado di AOFB, a expresa su conviccion cu e iniciativa ta parte di un movecion mas grandi. Segun Lutz, e colaboracion entre organisacionnan y boluntarionan ta crea mas consciencia no solamente na Aruba, sino tambe na Corsou y Merca.
Ademas, Lutz a destaca cu e team completo di Aruba a haya entrenamento, practica y tacticanan na Merca pa por maneha y opera e trailer di asistencia cu ta wordo uza pa acerca adictonan riba caya.
Segun Lutz, ora organisacionnan y comunidadnan traha hunto, ta posibel logra mas progreso den mehora e bienestar di adictonan ambulante y brinda nan un oportunidad pa un bida mas digno.
