Aña 2024 Aruba Marriott a conoce un record den promocion
pa su asociadonan. Cada promocion ta significa un oportunidad nobo pa siña pero alabes un
oportunidad nobo pa e profesionalnan den comunidad por solicita. Danzill Colina ta encarga pa
supervisa e departamento di Housekeeping. Nan trabou ta pa garantisa cu tur e huespednan ta
haya un camber limpi. Ademas nan ta haci nan maximo esfuerso pa tene e demas areanan
limpi y nechi. Cada propiedad di Aruba Marriott tin caracteristica unico, na Ocean Club ta cu
nan tin “repeat owners” cu ta bishita e propiedad cada dos of tres biaha pa aña. Tin biaha nan
sa keda maximo tres luna pasobra nan ta encanta e servicio cu Aruba Marriott tin pa ofrece. E
promocion cu el a ricibi tabata algo cu e tabata trahando duro p’e. P’un tempo caba nan tabata
bis’e cu e ta manera un supervisor door cu e ta cla pa cualkier situacion di emergencia. Danzill
lo recomenda pa traha na Aruba Marriott si bo tin pasion pa loke bo ta traha mirando cu e ta un
compania cu ta laga bo crece. E mes a inicia como un “Front Desk Agent” y awo e ta
“Housekeeping Supervisor.”
Jude de Windt ta traha den e area di “Recreation” na Surf Club. Na Aruba Marriott e ta traha cu
e huespednan, manteniendo e area di pool y garantisando cu tur e mashinnan tin serbete.
Ademas e mester por garantisa cu si e huesped mester di algo e por yuda yega na un solucion.
Loke ta haci Aruba Marriott special, segun Jude de Windt, ta cu na Aruba Marriott semper tin
espacio pa su asociadonan por sigui crece, sea ta fisicamente, mentalmente of spiritualmente.
Di e manera aki nan ta crea diferente habito cu ta na nan bienestar. E promocion cu Jude de
Windt a ricibi a pone cu el a haya un otro experiencia y pa siña mas. E lo recomenda pa traha
na Aruba Marriott pasobra e compania ta duna un espacio pa crece.
Alexsander Figaroa actualmente ta e “Quality Supervisor” na Aruba Marriott. Su trabou ta
encera cu e mester traha cu hopi departamento, mas tanto operacion pa asina mehora e
servicio brinda na e huespednan. Tur dia ta traha hunto cu e demas lidernan pa duna e miho
servicio posibel na e huespednan y laga nan sinti nan cas. Aruba Marriott ta duna un
sentimento di famia. E asociadonan ta pasa asina tanto tempo hunto cu nan ta sinti nan mes na
cas. Nan semper ta traha cu un bon actitud, curason y cu un sonrisa. Aruba Marriott ta brinda e
oportunidad pa ta su mes, eherce su trabou y sigui crece. E promocion cu el a ricibi aña pasa a
impact’e den hopi manera. E ta sinti cu tur cos den bida a alinea. Alexsander Figaroa a expresa
cu e ta sinti mas alegre y saludabel den su estilo di bida danki na e hermentnan cu Aruba
Marriott ta brind’e. E ta recomenda tur hende pa traha na Aruba Marriott pasobra e ta un
compania grandi y reconoci rond di mundo. E ta un compania cu ta duna bo tur e hermentnan
necesario, abo lo mester duna bo pasion y perseverancia pa bo yega caminda cu bo kier.
Alexsander Figaroa a cuminsa den “Housekeeping” y awo e ta “Quality Supervisor”.
Tashonna Laird a inicia bisando cu Aruba Marriott ta hopi special p’e pasobra e ta compania
grandi cu tin un compromiso cu su asociadonan y alabes ta duna nan bon beneficio. Aruba
Marriott ta conta cu hopi beneficio pa su asociadonan y ta compronde e balans entre trabou y
bida diario. Aruba Marriott ta hopi comprensivo. Nan tin programa pa a asociadonan crece y
siña mas. E promocion cu el a ricibi aña pasa a dun’e un “extra boost” na e confiansa cu e tin
den su mes. El a dun’e mas opcion pa sigui padilanti y a mustr’e cu no tin limite pa logro bo
soñonan. Tin hopi cos cu por siña den e posicion di – Guest Experience Expert. E ta duna mas
chens pa bay dilanti den bida. E lo recomenda pa traha na Aruba Marriott, haya mas
oportunidad y beneficio. E tin tres aña trahando cu Aruba Marriott y el a logra hopi caba. El a
logra su cas y su auto.
Raisa Tromp, ta Sushi Chef na e Lobby di Aruba Marriott. Raisa Tromp ta esun encarga cu e
sushi bar na Aruba Marriott. E tin cu mantene su coleganan contento pa nan por duna bon
servicio na e huespednan. Loke ta haci Aruba Marriot special ta cu e ta un compania cu ta
brinda hopi oportunidad. “Si bo ta un persona cu ta gusta bay dilanti, Aruba Marriott ta yuda bo
den esey”, asina el a comenta. E promocion cu el a ricibi tabata uno hopi positivo, no
unicamente financieramente sino tambe door di e trainingnan. Nan ta haya training pa dirigi y
tambe culinario. Raisa Tromp ta recomenda pa traha na Aruba Marriott si bo ta un hende cu ta
gusta bay dilanti mirando cu e compania ta ofrece training y curso. Ademas pa loke ta trata e
area culinario, cada tanto luna nan ta trece diferente chef for di afo pa haya sa mas tocante e
innovacionnan cu tin den e mundo culinario.
Ryan Rampersaud, Director of Casino Operations pa Stellaris Casino, su trabou ta encera pa
dirigi e operacion di e casino y garantisa e satisfaccion di e clientenan. Stellaris Casino ta un di
e casinonan di mas grandi na Aruba, pues tin hopi local y turista ta bishit’e. Ryan Rampersaud
su trabou ta pa tur cos den e casino bay bon for di yegada te cu nan salida. Loke ta haci Aruba
Marriott special ta cu e ta un compania cu ta cuida su asociadonan. Nuebe aña pasa Ryan
Rampersaud a cuminsa su carera na e hotel como “Assistant Manager” y awo e tin un rol mas
grandi. Aña pasa el a ricibi un promocion, Ryan Rampersaud ta conta cu e semper a aspira pa
crece. E promocion tabata un motivacion pa e sigui crece pa su famia y su yiunan. Sin duda, e
lo recomenda pa traha na Aruba Marriott mirando cu e ta un di e companianan di hospitalidad di
mas grandi na mundo. E ta di pensamento cu si bo tin un pasion pa duna servicio, Aruba
Marriott ta un di e companianan miho den esaki.
Na aña 2024 Aruba Marriott a conoce un total di 245 promocion interno pa e asociadonan.
Luzdary Patterson-Leest a indica cu esaki tabata oportunidadnan cu a presenta pa e
asociadonan por a subi di posicion of cambia di carera den e mesun departamento. Tur aña e
oportunidadnan aki ta presenta sinembargo aña 2024 tabata un record. Tin di e asociadonan cu
tabata den nan funcion pa hopi aña pero tabatin wowo pa un reto nobo. Hopi asociado di Aruba
Marriott tin meta grandi pa nan carera pues e sentimento ta uno cu ta sigui den 2024 unabes cu
nan a haya e oportunidad pa crece. Aruba Marriott a haci algun cambio den algun titulo por
ehempel awo tin “Guest Experience Expert” cu ta encera e posicion di “Front Desk Agent” y
“Rooms Controller” cu awo ta uno. Esaki a pone cu e asociado por experencia cada area di
Front Office. Esaki ta haci cu tin mas oportunidad pa join e departamento. Cu cada promocion,
ta habri mas espacio pa hende solicita. Tin diferente posicion habri, esunnan interesa por
solicita na marriott.com/careers. Riba e website por mira tur posicion disponibel y aplica.
