E resultado di eleccion Hulandes di 17 maart 2021 ta papia palabra cla cu e pueblo Boneriano no ta contento. Esaki ta un“rechaso di gobernacion Hulandes” indiscutibel.
E resultado di diaranson ta mustra un mensahe cla pasobra for di 13490 hendenan cu tabatin derecho di vota, ta solamente 3076 so a bay urna representando 22%. 10414 votadonan malcontento no a bay vota. E ultimo eleccion di tweede kamer di 2017 tabata mescos cu 77% no a vota y mescos tabata na 2012 e resultado tabata similar 76% no a vota. Nos Ke Boneiro Bek su campaña: No bay vota” manera semper tabata determinante den e victoria caminda un biaha mas cu e pueblo a uni aunke cu nan ta di diferente partidonan politico, nan a uni y demostra nan malcontento y nenga di tuma parti den e forsa di democracia aki.
E eleccion aki cu a keda impone riba e pueblo Boneriano ta un burla of farsa di democracia pa nos pueblo pasobra ta mes un parlamento Hulandes aki, tweede kamer a hancra nos den nan constitucion sin derecho igual ta consisti di 150 asiento situa na Den Haag, caminda nan tur a bay di acuerdo cu e acto criminal contra nos pueblo. Pa un asiento mester di mas o menos 60 mil voto y na Boneiro tin 13 mil hende ku derecho di vota y nos no tin niun chens matematico. Mas imposibel ta pa cambia Constitucion Hulandes bek nan nos fabor pa duna nos derecho igual, nos mester dos-tersera (2/3) di e parlamento Hulandes, cu ta 100 asiento pa bay di acuerdo pa cambia esaki bek. No solamente den un periodo di gobernacion pero den dos diferente eleccion y periodo di gobernacion e 100 miembronan di parlamento of tweede kamer Hulandes mester bay di acuerdo cu esaki.
E partidonan politico MPB, UPB I DP nan lidernan prominente, lidernan di sindicato di Bonaire, y otronan, tur agresivamente a promove na gran escala via television, radio y aviso den corant. Un campaña di eleccion hopi elabora y costoso nunca bisto na Boneiro na fabor di partidonan politico Hulandes cu nan tin aliansa cu ne na Hulanda. Nan tur a kere cu e biaha aki lo tabata diferente pero nan tur a keda cu berguensa pa motibo di participacion hopi abou. E resultado ta un recordatorio fuerte cu e pueblo no a scoge pa integracion y cu nan a keda forsa den un aneksashon ilegal.
E parlamento Hulandes, tweede kamer, a anexa e islanan BES, incluyendo Bonaire riba 10 october 2010 y a elimina e derechonan democratico di e pueblo Boneriano. Desde 10.10.10 e parlamento of conseho insular di Bonaire, scoge democraticamente pa pueblo Boneriano a wordu sub-ordina bao di gobernacion y ley Hulandes y a start cu un tipo di gobernacion colonial institucionalisa di siglo 21 riba nos pueblo. Na october 2017 e parlamento y gobierno Hulandes unilateralmente pa medio di un ley no-demokratiko a completa e aneksashon ilegal dor di entegra e pueblo Boneriano sin derecho igual den constitucion Hulandes degradando nan na nivel di ciudadanonan di segundo clase den un forma nobo di apartheid den Reino Hulandes y mundo. E pueblo Boneriano desde e tempo ey ta wordo goberna den un status cu e no a scoge, sin derecho igual, un status cu un rechaso abrumador, un voto No decisivo di e pueblo den referendum di 2015.
Nos fundacion Nos Ke Boneiro Bek su campañanan consistente di conscientisacion a duna resultado, y a para firme, pasobra e pueblo no a bay tras di e campaña manipulativo den media di nan lidernan, cu por wordo considera traidor di nan mes pueblo. E pueblo Boneriano a para firme y a rescata su dignidad, pasobra mas cu 77% di e electorado a protesta pa medio di e accion di no-vota contra di e invasion y ocupacion Hulandes di Boneiro. Nos Ke Boneiro Bek lo continua traha diligentemente riba nos trayectorio pa pone Bonaire bek riba lista di teritorionan-sin-propio-gobernashon di NacionnanUni.
1 comment