Parlamentario Xiomara Maduro tabata presente na e evento conmemorativo cu Archivo Nacional Aruba (ANA) a organisa den conexion cu e Dia Internacional pa Recorda e Comercio Transatlantico di Sclavitud y su Abolicion.
E tabata un atardi special di conmemoracion, educacion y reflexion, cu presentacionnan na encargo di Archivo Nacional Aruba, UNESCO, Comite di Reino pa Conmemoracion di Sclavitud y PENSA.
Durante e programa a presenta algun video tocante nos “heroenan di libertad”: esnan cu, cu nan curashi y resistencia, a lucha pa libertad y dignidad humano.
E talentoso Jair Britten a brinda un aporte musical cu a duna e atardi un ambiente ainda mas profundo y significativo.
E evento a culmina cu un momento di reflexion, durante cual esnan presente por a comparti nan pensamento y sentimiento riba sclavitud y e impacto cu e pasado aki ainda tin riba nos sociedad.
Pa Parlamentario Maduro, evento manera esaki ta importante pa mantene nos memoria historico bibo y pa duna e siguiente generacionnan un mihor comprension di e pasado. “Recorda nos historia no ta pa nos keda pega aden, sino pa honra esnan cu a sufri, reconoce esnan cu a resisti y compronde con e pasado a forma nos sociedad. Solamente asina nos por sigui traha hunto riba un futuro basa riba libertad, igualdad y respet pa dignidad di cada ser humano,” Maduro a expresa.
E parlamentario ta gradici Archivo Nacional Aruba y tur e organisacionnan y personanan cu a contribui na e evento importante aki.
