Na Cede di Partido MEP, diadomingo 28 di februari, a tuma luga e sorteo virtual di e rifa pa recuada fondo pa campaña electoral na september venidero. Lider di MEP, Prome Minister Evelyn Wever-Croes, den nomber di Partido MEP, a gradici tur esnan cu a contribui den e recaudacion aki pa yuda Partido cu fondo pa campaña. Nos ta den aña di eleccion y un aña particular door di Covid-19 sinembargo mester cuminsa prepara pa eleccion 2021 y pa esaki Partido MEP ta conta cu sosten di Pueblo di Aruba. E rifa a wordo hopi bon bendi pa cua Partido MEP ta hopi satisfecho y gradecido.
Partido MEP a celebra 50 aña di existencia, no na grandi, pero si tawata tin y lo bay tin momentonan di conmemoracion y celebracion. Siman pasa Partido MEP a lanta Fundacion pa Formacion Politico Nelson Orlando Oduber. Esaki pa Partido MEP ta un soño realisa pa asina train candidatonan nobo y duna charla y workshopnan na comunidad en general.
Mescos cu el a haci durante e ultimo 50 añanan, Partido MEP lo sigui traha incansablemente pa logra alcansa e maximo felicidad pa cada ciudadano riba e pida baranca aki. Esaki ta e compromiso cu MEP tin cu e pueblo di Aruba.
Riba e diadomingo mes e ganado a wordo conoci cu e number ganado 07824. Partido MEP ta felicita e ganado y ta gradici tur cu a cumpra rifa den e temporada dificil. Danki pa e sosten. Danki pa semper tey pa MEP.
