Na kuminsamentu di novèmber a kuminsá ku e trabounan pa konstruí un rotònde nobo na Kaya Amsterdam. E trabounan ta bai segun skema i lo finalisá na luna di yanüari.
Na e momentunan aki ya kaba nan a basha e promé dos kapanan di asfalt. Na luna di yanüari ta basha e kapa mas ariba ku ta nesesario riba e karetera. Den kaso ku lo a habri e rotònde for di awor aki kaba, tin chèns ku trùknan pisá ta okashoná daño na e rotònde. Pa e motibu aki a skohe pa habri e rotònde te ora ku e trabou ta kla kompletamente. Ekspektativa ta ku esaki ta tuma lugá den e último siman di yanüari.
Ta konstruí diferente karetera na Boneiru di nobo komo parti di e ‘Programa di Mas Aña di Mantenshon di Kaminda di Boneiru – ‘Meerjaren Onderhoudsprogramma Wegen Bonaire‘. Gobièrnu di Reino ta finansiá e trabounan. Pa aña 2021 en todo kaso Kaya Amsterdam i Kaya Gobernador Debrot ta riba programa pa renobashon. Resientemente a publiká diseño di Kaya Amsterdam. Entretantu a finalisá e diseño pa Kaya Gobernador Debrot tambe i riba término korto lo publiká esaki. Na kuminsamentu di aña 2021 lo tene destaho pa renobashon di e dos kayanan aki, di manera ku e trabounan por kuminsá den e di dos kuartal.
